Jekk tgħix ġewwa l-Istati Uniti tal-Amerka jew jekk il-post prinċipali tan-negozju tiegħek huwa bbażat ġewwa l-Istati Uniti tal-Amerka, qed taqbel mar- Regoli tas-Servizz ta' Snap Inc.

Jekk tgħix barra l-Istati Uniti tal-Amerka jew jekk in-negozju tiegħek huwa bbażat barra l-Istati Uniti tal-Amerka, il-ftehim li qed taqbel miegħu huwa r-Regoli tas-Servizz ta' Snap Group Limited.

Ktibna dawn ir-Regoli tas-Servizz (li se nsejħulhom “Regoli”) biex tkun taf ir-regoli li jirregolaw s-sħubija tagħna miegħek bħala utent ta' Snapchat, Bitmoji jew kwalunkwe prodotti jew servizzi oħra tagħna li huma suġġett għal dawn ir-regoli bħal My AI (li nirreferu għalihom kollettivament bħala “Servizzi”). Is-Servizzi tagħna huma ppersonalizzati u nipprovdu informazzjoni dwar kif jaħdmu taħt dawn ir-Regoli, fiċ-Ċentru tal-Privatezza u s-Sigurtà, fuq is- Sit ta' Appoġġ u fis-Servizzi tagħna (bħal notifiki, kunsensi u "Settings"). L-informazzjoni li nagħtu hija s-suġġett ewlieni ta' dawn ir-Regoli.

Għalkemm għamilna l-almu tagħna biex niktbu dawn ir-Regoli bi kliem ħafif, hemm xi postijiet fejn xorta se jinħassu qishom kuntratt tas-soltu. Ir-raġuni hija li dawn ir-Regoli huma ftehim b'rabta legali bejnek u bejn Snap Inc. (“Snap”). Għalhekk jekk jogħġbok aqrahom bir-reqqa.

Meta tagħżel li tuża s-Servizzi tagħna, tkun qed taqbel mar-Regoli. Jekk taqbel ma' dawn ir-Regoli, Snap tagħtik liċenzja biex tuża dawn is-Servizzi skont dawn ir-Regoli u l-politiki tagħna. Il-liċenzja ma tistax tgħaddiha lil ħaddieħor, mhix se tkun esklussiva għalik u ma tistax taqsam parti minnha ma' persuni oħra. Tużax is-Servizzi jekk ma taqbilx mar-Regoli.

Dawn ir-Regoli jgħoddu għalik jekk tgħix ġewwa l-Istati Uniti tal-Amerka jew jekk in-negozju tiegħek huwa bbażat ġewwa l-Istati Uniti tal-Amerka. Jekk tgħix barra l-Istati Uniti tal-Amerka jew jekk in-negozju tiegħek huwa bbażat barra l-Istati Uniti tal-Amerka, is-Servizzi se jingħatawlek minn Snap Group Limited u l-ftehim fis-seħħ se jkun ir-Regoli tas-Servizz ta' Snap Group Limited.

AVVIŻ DWAR L-ARBITRAĠĠ: IKTAR 'IL QUDDIEM F'DAWN IR-REGOLI SE SSIB KLAWŻOLA TAL-ARBITRAĠĠ. ĦLIEF GĦAL XI XORTA TA' TILWIM IMSEMMIJIEN F'DIK IL-KLAWŻOLA TA’ ARBITRAĠĠ, INT U SNAP INC. TAQBLU LI T-TILWIM TA' BEJNIETKOM JINĠIEB QUDDIEM, U JINQATA' MINN, ARBITRAĠĠ OBBLIGATORJU LI JORBOT LIT-TNEJN LI INTOM U LI INT U SNAP IĊĊEDU KULL JEDD LI TIEĦDU SEHEM FI PROĊEDIMENT KOLLETTIV JEW F'ARBITRAĠĠ BĦALA GRUPP. GĦANDEK IL-JEDD LI TINĦALL MILL-ARBITRAĠĠ KIF IMFISSER F'DIK IL-KLAWŻOLA TA’ ARBITRAĠĠ.

Is-Servizzi tagħna mhux immirati għat-tfal taħt l-età ta' 13-il sena u biex toħloq kont u tuża s-Servizzi jeħtieġlek tikkonferma li għalaqt it-13-il sena. Jekk insiru nafu li għadek m'għalaqtx it-13-il sena (jew l-età minima meħtieġa biex persuna tuża s-Servizzi mingħajr il-kunsens tal-ġenituri fl-istat, fil-provinċja jew fil-pajjiż tiegħek, jekk ikbar), nieqfu nipprovdu s-Servizzi tagħna għalik u se nħassru l-kont u d-data tiegħek. Nistgħu noffru Servizzi addizzjonali b'regoli oħra li jafu jeħtieġu li tkun ikbar minn 13-il sena biex tużahom. Għalhekk jekk jogħġbok aqra r-regoli kollha bir-reqqa. Meta tuża s-Servizzi qed tistqarr, tagħti garanzija u taqbel li:

• għandek is-setgħa legali tidħol fi ftehim b'rabta legali ma' Snap;

• m'intix persuna li skont il-liġijiet tal-Istati Uniti tal-Amerka jew xi ġurisdizzjoni oħra ma tistax tuża s-Servizzi — fosthom, li pereżempju ma tissemmiex fuq il-lista Specially Designated Nationals tad-Dipartiment tat-Teżor Amerikan jew xi restrizzjoni oħra bħal din;

• qatt ma nstabt ħati/ħatja ta' reati sesswali; u

• se tobdi dawn ir-Regoli (fosthom ir-regoli u l-politiki kollha msemmija f'dawn ir-Regoli bħal-Linji Gwida tal-Komunità, il-Linji Gwida għall-Mużika fuq Snapchat u l-Politika tal-Kontenut Kummerċjali) u l-liġijiet, ir-regoli u r-regolamenti lokali, statali, nazzjonali u internazzjonali kollha li obbligat/a timxi magħhom.

Jekk qed tuża s-Servizzi f'isem negozju jew xi entità oħra, int tikkonferma li int awtorizzat li torbot lil dak in-negozju jew entità ma' dawn ir-Regoli u taqbel ma' dawn ir-Regoli f'isem dak in-negozju jew entità (u r-referenzi kollha għall-kelma “int” u “tiegħek” f'dawn ir-Regoli se jfissru kemm int bħala utent privat kif ukoll dak in-negozju jew entità). Jekk qed tuża s-Servizzi f'isem entità tal-Gvern tal-Istati Uniti tal-Amerka, int taqbel mal-Bidla fir-Regoli tas-Servizz ta' Snap Inc. għall-Utenti tal-Gvern tal-Istati Uniti tal-Amerka.

Fi ftit kliem: Is-Servizzi tagħna mhux immirati għat-tfal taħt l-età ta' 13-il sena jew li għadhom m'għalqux is-snin meħtieġa biex ikunu jistgħu jużaw is-Servizzi fl-istat, fil-provinċja jew fil-pajjiż tagħhom jekk din l-età hija ikbar minn 13-il sena. Jekk insiru nafu li m'għandekx l-età meħtieġa se nissospendu l-użu tiegħek għas-Servizzi u se nħassru l-kont u d-data tiegħek. Jaf ikun hemm xi regoli oħra fis-seħħ għas-Servizzi tagħna u dawn ir-regoli jeħtiġuk li tkun ikbar biex tuża dawn is-Servizzi għalhekk jekk jogħġbok aqrahom bir-reqqa meta nitolbuk tagħmel hekk.

Ħafna mis-Servizzi tagħna jħalluk toħloq, ittella', tippubblika, tibgħat, tirċievi u taħżen il-kontenut. Meta tagħmel hekk, l-ewwel ħaġa hi li int iżżomm kull jedd ta' sjieda li kellek għall-kontenut filwaqt li tagħtina liċenzja biex nużaw dak il-kontenut. Kemm tkun wiesgħa l-liċenzja jiddependi mis-Servizzi li tuża u l-għażliet li tkun għażilt.

Għall-kontenut kollu li tibgħat fuq is-Servizzi (fosthom il-Kontenut Pubbliku), int tagħti lil Snap u lill-imsieħba tagħna liċenzja dinjija, mingħajr royalties, li tista' titwettaq minn ħaddieħor u li nistgħu ngħadduha lil ħaddieħor biex inżommu, naħżnu, naħżnu kopja, nużaw, nuru, nibdlu, naddattaw, neditjaw, nippubblikaw, nifhmu, nxandru u nqassmu dak il-kontenut. Il-liċenzja tingħata biex inħaddmu, niżviluppaw, nagħtu, nirriklamaw u ntejbu s-Servizzi u biex noħorġbu b'servizzi ġodda u niżviluppawhom. Din il-liċenzja tagħtina l-jedd li naqsmu l-kontenut tiegħek u ngħaddu dawn il-jeddijiet lil operaturi tas-servizzi li għandha ftehim magħhom, biex jagħtuna s-Servizzi tagħhom, biex jagħtuna s-Servizzi tagħhom biss.

L-Istejjer Pubbliċi u l-kontenut kollu l-ieħor li tibgħat lis-Servizzi pubbliċi tagħna bħal pereżempju l-Profili Pubbliċi, Spotlight, il-Mappa ta' Snap jew Lens Studio nsejħulhom “Kontenut Pubbliku”. Billi l-Kontenut Pubbliku huwa minnu nniffsu pubbliku, int tagħti lil Snap, lill-imsieħba tagħha, lil utenti oħra ta-Servizzi u lill-imsieħba kummerċjali tagħna liċenzja u jedd dinjija, mingħajr royalties li, għal dejjem, nistgħu nużaw ix-xogħol tiegħek biex noħolqu xogħlijiet oħra minnu u nirriklmaw, nuru, nxandru, nuru fuq pjattaformi oħra, nippupjaw, inqassmu, nissinkronizzaw, inqiegħdu xi grafika jew ħsejjes fuq, inxandru pubblikament u nuru pubblikament kull parti tal-Kontenut Pubbliku tiegħek f'kull forma u fuq kull mezz tax-xandir jew tat-tqassim, kemm mezzi li nafu bihom issa u dawk li għadhom iridu jinħolqu, kemm għal skopijiet kummerċjali kif ukoll għal skopijiet mhux kummerċjali. Din il-liċenzja tgħodd għall-vidjos, l-istampi, l-ħsejjes u l-kompożizzjonijiet mużikali li jinsabu fil-Kontenut Pubbliku tiegħek kif ukoll għall-isem, l-istampa, id-dehra u l-leħen ta' kull minn jidher fil-Kontenut Pubbliku li toħloq, ittella', tippubblika, tibgħat jew tidher fih (fosthom kif jintwerew fil-Bitmoji tiegħek). Dan ifisser li, fost l-oħrajn, mhux se jkollok jedd għal ebda kumpens jekk il-kontenut, il-vidjos, ir-ritratti, il-ħoss, il-kompożizzjonijiet mużikali, l-isem, l-istampa, id-dehra jew il-leħen tiegħek jintużaw minna, mill-imsieħba tagħna, mill-utenti tas-Servizzi jew mill-imsieħba kummerċjali tagħna. Għal iktar informazzjoni fuq kif tagħżel min jista' jara l-kontenut tiegħek, jekk jogħġbok aqra l-Politika tal-Privatezza u s-Sit tal-Għajnuna tagħna. Il-Kontenut Pubbliku kollu għandu jkun addattat għal mill-inqas dawk li għalqu t-13-il sena.

Għalkemm m'aħniex obbligati nagħmlu hekk, għandna l-jedd li niftħu, niċċekkjaw, ngħarblu u nħassru l-kontenut tiegħek meta rridu u għal liema raġuni rridu fosthom biex noffru u niżviluppaw is-Servizzi jew jekk naħsbu li l-kontenut tiegħek jikser dawn ir-Regoli jew xi liġi oħra li obbligati nimxu magħha. Biss, int biss se tkun responsabbli għall-kontenut li toħloq, ittella' tippubblika, tibgħat jew taħżen bis-Servizzi tagħna.

Aħna u l-imsieħba tagħna nistgħu nqiegħdu r-riklami fuq is-Servizzi, fosthom riklami personalizzati skont l-informazzjoni li taqsam magħna, li niġbru jew li niksbu dwarek. Kultant xi riklami jafu jidhru qrib, bejn, fuq jew fil-kontenut tiegħek.

Dejjem nieħdu gost meta l-utenti tagħna jiktbulna. Biss jekk taqsam magħna xi ħsibijiet, kummenti jew suġġerimenti, żomm f'moħħok li nistgħu nużawhom mingħajr ma nagħtuk ebda kumpens u mingħajr ebda restrizzjoni jew obbligi lejk. Int taqbel li aħna jkollna kull jedd ta' kull ħaġa li noħolqu skont dawn il-ħsibijiet, kummenti jew suġġerimenti.

Fi ftit kliem: Jekk ittella' l-kontenut tiegħek fuq is-Servizzi, int tibqa' s-sid imma tkun qed tagħti permess lilna u lil oħrajn biex nużawh biex noffru u nġibu 'l quddiem is-Servizzi tagħna. Tkun qed tagħti permess ukoll li utenti oħra jaraw u, f'xi każijiet, jużaw il-kontenut kollu li taqsam mal-oħrajn fuq is-Servizzi. Anki jekk għandna għadd ta' jeddijiet li nibdlu u nneħħu l-kontenut tiegħek, int dejjem se tkun responsabbli għal kull ħaġa li toħloq, tippubblika jew taqsam.

Xi regoli u kundizzjonijiet addizzjonali li jissemmew fil-paġna Regoli u Politiki ta' Snap jew li b'xi mod ieħor huma disponibbli għalik jistgħu japplikaw għal Servizzi speċifiċi. Jekk tuża dawk is-Servizzi, dawk ir-regoli addizzjonali jistgħu jgħoddu għalik u għalhekk isiru parti minn dawn ir-Regoli. Pereżempju, jekk tixtri jew tuża xi faċilitajiet bil-ħlas li aħna nagħmlu disponibbli għalik fuq Snapchat (bħal abbonament Snapchat+ jew Tokens, imma mhux s-servizzi ta' reklamar), int qed taqbel li r-Regoli tal-Faċilitajiet bil-Ħlas tagħna japplikaw. Jekk xi regoli addizzjonali applikabbli ikunu f'kunflitt ma' dawn ir-Regoli, ir-regoli addizzjonali se jieħdu preċedenza u se jissostitwixxu il-kunflitti ta' dawn ir-Regoli waqt li qed tuża s-Servizzi li huma marbuta ma' dawk ir-regoli addizzjonali.

Fi ftit kliem: Jaf ikun hemm xi regoli oħra li jgħoddu għalik, jekk jogħġbok ħu ftit ħin biex taqrahom sew.

Il-privatezza tiegħek importanti għalina. Tista' taqra l-Politika tal-Privatezza tagħna biex issir taf kif nipproċessaw l-informazzjoni tiegħek int meta tuża s-Servizzi tagħna.

Is-Servizzi tagħna jipprovdu esperjenza personalizzata biex ikunu iktar relevanti u ta' interess ikbar għalik. Se nirrakkomandawlek kontenut, reklamar u informazzjoni oħra bbażati fuq dak li nafu jew dak li, minn kif tuża s-Servizzi tagħna, nistgħu nissoponu dwar l-interessi tiegħek u ta' oħrajn. Huwa meħtieġ għalina li nimmaniġġjaw l-informazzjoni personali tiegħek għal dan l-iskop, kif nispjegaw fil- Politika tal-Privatezza tagħna. Sakemm ma tagħżilx inqas personalizzazzjoni mis-Servizzi, il-personalizzazzjoni hija waħda mill-kundizzjonijiet tal-kuntratt tagħna miegħek biex inkunu nistgħu nagħmlu hekk. Tista' żżur is- Sit ta 'Appoġġ tagħna biex tikseb iktar dettalji dwar ir-rakkomandazzjonijiet personalizzati.

Fi ftit kliem: Is-Servizzi tagħna jipprovdu esperjenza personalizzata, inkluż reklamar u rakkomandazzjonijiet oħra għalik bbażati fuq id-data li niġbru skont kif spjegat kemm hawn kif ukoll fil- Politika tal-Privatezza tagħna.

Il-biċċa l-kbira tal-kotenut fuq is-Servizzi tagħna jinħoloq mill-utenti, mill-pubblikaturi u minn persuni oħra barra l-kumpanija tagħna. Kemm jekk dak il-kontenut jitpoġġa pubblikament jew jintbagħat privatament, il-kontenut huwa r-responsabbiltà unika tal-utent jew tal-entità li ssottomettiewh. Għalkemm Snap tirriserva d-dritt li tirrevedi, timmodera jew tneħħi l-kontenut kollu li jidher fuq is-Servizzi, aħna ma nirrevedux dan kollu. Allura ma nistgħux - u ma nagħtux - garanzija li utenti oħra jew il-kontenut li jipprovdu permezz tas-Servizzi se jikkonformaw mat-Termini, il-Linji Gwida tal-Komunità jew it-termini, il-politiki jew il-linji gwida l-oħra tagħna. Tista' żżur is-Sit tal-Għajnuna tagħna biex issir taf iktar dwar kif Snap tgħarbel il-kontenut.

L-utenti jistgħu jirrappurtaw kontenut maħluq minn oħrajn jew kontijiet ta' oħrajn għal ksur tar-Regoli, tal-Linji Gwida tal-Komunità u ta' linji gwida u politiki oħra. Tista' żżur is-Sit tal-Għajnuna tagħna għal iktar informazzjoni fuq kif tirrapporta l-kontenut u l-kontijiet.

Għalkemm nittamaw li tifhem kull deċiżjoni li nieħdu dwar il-kontenut jew il-kontijiet tal-utenti, jekk ikollok xi lmenti jew tħassib tista' tibgħathomlna mill-formola li tista' ssib minn hawn jew tuża l-għażliet li se ssib fl-app. Jekk tuża dan il-proċess, l-ilment tiegħek għandu jintbagħat fi żmien sitt xhur mit-teħid ta' dik id-deċiżjoni li tkun qed tilmenta dwarha.

Hekk kif nirċievu l-ilment tiegħek aħna se:

• niżguraw li l-ilment jitqies fil-ħin, mingħajr diskriminazzjoni, bir-reqqa u skont il-proċess;

• nreġġgħu lura d-deċiżjoni tagħna jekk insibu li kellna żball; u

• navżawk minnufih bid-deċiżjoni li nkunu ħadna u jekk tistax tagħmel xi ħaġa biex tibdel l-affarijiet.

Fi ftit kliem: Il-biċċa l-kbira tal-kontenut fuq is-Servizzi huwa ta' jew huwa kkontrollat minn oħrajn u aħna m'għandna l-ebda kontroll jew responsabbiltà fuqu. Għandna politiki u proċessi għall-għarbiel tal-kontenut fis-seħħ li jgħoddu għall-kontenut fuq is-Servizzi.

Skont il-ftehim tagħna, Snap hija sid is-Servizzi li jiġbru fihom id-ditti, ix-xogħlijiet, l-avatars Bitmoji li tibni, is-software u l-kontenut, il-faċilitajiet u t-teknoloġija l-oħra tagħna marbuta magħhom.

Jeħtieġlek tħares il-jeddijiet ta' Snap u timxi mal-Linji Gwida tad-Ditta ta' Snapchat, mal-Linji Gwida tad-Ditta ta' Bitmoji u mal-linji gwida, mal-paġni tal-għajnuna jew mal-Mistoqsijiet Komuni l-oħra ppubblikati minn Snap jew l-imsieħba tagħna. Dan ifisser li, fost l-oħrajn, ma tistax tipprova, tgħin jew tħeġġeġ lil ħaddieħor jagħmel dawn li ġejjin u li jekk tagħmel hekk aħna nistgħu nissospendu jew inneħħulek l-aċċess għas-Servizzi:

• uża l-marki tad-ditta, il-logos, l-ikoni, id-disinn tal-interfaċċa għall-utent, id-dehra u l-preżentazzjoni tad-ditta, id-disinji, ir-ritratti, il-vidjos jew xorta ta' materjal ieħor li Snap tuża fis-Servizzi ħlief dawk li dawn ir-Regoli, il-Linji Gwida tad-Ditta ta' Snapchat, il-Linji Gwida tad-Ditta ta' Bitmoji jew il-linji gwida tad-ditta l-oħra ppubblikati minn Snap jew l-imsieħba tagħna jagħtuk permess ċar li tuża;

• b'xi mod tikser il-jeddijiet tal-awtur, il-marki kummerċjali jew xi jeddijiet tal-propjetà intellettwali oħra anki jekk tuża s-Servizzi biex tibgħat, turi, tippubblika jew toħloq xi xorta ta' kontenut li jikser dawn il-jeddijiet;

• tikkopja, tibdel, taħżen, tniżżel, ittella', taqsam, ixxerred, tbigħ, tikri, turi fuq pjattaformi oħra, ixxandar, turi, tagħti kopja, tuża f'xogħol ieħor jew b'xi mod ieħor tuża s-Servizzi jew il-kontenut fuq is-Servizzi, bl-eċċezzjoni tal-fajls temporanji li jinżammu awtomatikament mill-brawżer tal-internet tiegħek biex ikun jista' jurik il-kontenut, b'mod li jmur kontra dak li għandek permess ċar għalih f'dawn ir-Regoli u li ma nkunux tajniek permess bil-miktub tagħmel hekk jew is-Servizz ma jkunx ħalliek tagħmel hekk bi ħsieb;

• toħloq kont ieħor jekk diġà ddiżattivajnielek il-kont tiegħek, tipprova tuża s-Servizzi minn apps mhux uffiċjali mingħajr permess, titlob id-dettalji għad-dħul fil-kont ta' utenti oħra jew tixtri, tbigħ jew tikri l-aċċess għall-kont tiegħek, għal isem tal-utent, għall-iSnaps jew għal ħolqa tal-ħbieb;

• tistudja t-teknikalitajiet tal-prodott, tikkopja, iżżarma l-kodiċi, iżżarma l-programm jew issib kif jaħdmu s-Servizzi (fosthom il-ħsieb jew l-algoritmu ta' warajhom) jew b'xi mod tikseb il-kodiċi tas-software tas-Servizz;

• tuża xi robot, brimba, għakrux, kissieb tad-dejta jew mezzi jew sistemi awtomatiċi oħra biex tikseb aċċess għas-Servizzi jew tikseb id-dettalji dwar l-utenti l-oħra;

• tuża jew tibni xi apps mhux uffiċjali li jaħdmu mas-Servizzi jew li jużaw xi kontenut jew informazzjoni oħra tal-utenti mingħajr il-permess bil-miktub tagħna;

• tuża s-Servizzi b'mod li jista' jfixkel, iħarbat, jolqot ħażin jew ma jħallix lil utenti oħra milli jagħmlu użu sħiħ mis-Servizzi jew b'mod li jista' jagħmel ħsara, jiddiżattiva, jgħabbi żżejjed jew ma jħallix lis-Servizzi jaħdmu;

• ittella' xi virus jew kodiċi qarrieqi ieħor jew b'xi mod tnaqqas, taqbeż jew iddur mas-sigurtà tas-Servizzi;

• tipprova ddur ma' xi tekniki li nużaw biex niffiltraw il-kontenut jew tipprova tidħol f'żoni jew tuża faċilitajiet tas-Servizz li m'għandekx permess tuża;

• tfittex, tqalleb jew tipprova ssib xi problema tas-sigurtà fis-Servizzi jew f'xi sistema jew netwerk tagħna;

• tikser xi liġi jew regola li obbligat/a timxi magħha meta tiftaħ jew tuża s-Servizzi; jew

• tiftaħ jew tuża s-Servizzi b'xorta ta' mod li m'għandekx permess ċar li tużah hekk skont dawn ir-Regoli jew il-Linji Gwida tal-Komunità tagħna.

Fi ftit kliem: Aħna s-sidien tal-kontenut, tal-faċilitajiet u tal-ħidmiet kollha tas-Servizzi u nikkontrollawhom kollha aħna. Biex inħarsu s-Servizzi u l-utenti l-oħra mill-ħsara, hemm xi regoli li neħtiġuk timxi magħhom meta tuża s-Servizzi tagħna. Jekk ma timxix ma' dawn ir-regoli, il-kont tiegħek jista' jiġi sospiż jew jitneħħa.

Snap tħares il-jeddijiet tal-oħrajn. U int għandek tagħmel l-istess. Għalhekk ma tistax tuża s-Servizzi, jew tgħin lil xi ħadd ieħor juża s-Servizzi, b'mod li jmur kontra jew jikser il-jeddijiet tal-personalità, tal-privatezza, tal-awtur, tat-trademark jew tal-propjetà intellettwali ta' ħaddieħor. Meta tibgħat xi kontenut lil Servizzi, int taqbel u tagħti garanzija li dak il-kontenut huwa tiegħek jew li għandek il-permessi u l-awtorizzazzjonijiet meħtieġa biex tkun tista' tibgħat fuq is-Servizzi (fosthom, jekk ikun il-każ, il-jedd li tagħmel kopji mekkaniċi tax-xogħol mużikali f'xi reġistrazzjoni tal-ħoss, li tissinkronizza xi kompożizzjoni ma' xi kontenut, li turi xi kompożizzjonijiet jew iddoqq reġistrazzjoni ta' xi ħsejjes pubblikament jew kull jedd ieħor fis-seħħ għall-mużika kollha li żżid mal-kontenut tiegħek li ma tingħatalekx minn Snap) u tagħti l-jeddijiet u l-liċenzji msemmija f'dawn ir-Regoli għall-kontenut tiegħek. Taqbel ukoll li mhux se tuża jew tipprova tuża xi kont ta' utent ieħor b'mod li jmur kontra l-permess mogħti lilek minn Snap jew l-imsieħba tagħha.

Snap tirrispetta l-liġijiet tal-jeddijiet tal-awtur fosthom id-Digital Millenium Copyright Act u b'mod raġjonevoli tipprova tneħħi kull materjal li jikser dawn il-jeddijiet li tkun taf bih mis-servizzi tagħna malajr. Jekk Snap issir taf li utent kiser il-jeddijiet tal-awtur għal għadd ta' drabi, aħna se nieħdu l-passi raġjonevoli li nistgħu biex nissospendu jew ngħalqu l-kont tal-utent. Jekk temmen li xi ħaġa fuq is-Servizz tagħna tikser jedd tal-awtur miżmum jew ikkontrollat minnek, jekk jogħġbok irrauppurtaha mill-formola li ssib f'din l-għodda. Inkella tista' tibgħat avviż lill-aġent tagħna: Snap Inc., Attn: Copyright Agent, 3000 31st Street, Santa Monica, CA 90405, email: copyright @ snap.com. Tużax dan l-indirizz tal-email għal skopijiet oħra għajr li tirrapporta ksur ta' jeddijiet tal-awtur għax dawk l-emails mhux se nagħtu kashom. Biex tirrapporta xi xorta ta' ksur ieħor fuq is-Servizzi, jekk jogħġbok uża l-għodda li ssib hawn. Jekk tibgħat avviż lill-Aġent tal-Jeddijiet tal-Awtur tagħna, l-avviż għandu jintbagħat skont ir-rekwiżiti mitluba minn 17 U.S.C. § 512(c)(3). Dan ifisser li l-avviż għandu:

• ikollu l-firma bil-miktub jew elettronika tal-persuna bis-setgħa li tirrappreżenta lil sid il-jedd tal-awtur;

• jagħraf ix-xogħol imħares bil-jedd tal-awtur li jkun qed jixli l-ksur tiegħu;

• jagħraf il-materjal li qed jixli bi ksur jew li jkun qed iwettaq għemil ta' ksur u li għandu jitneħħa jew jiġi diżattivat u jagħti biżżejjed informazzjoni raġjonevoli biex inkunu nistgħu nsibu l-materjal;

• jagħti d-dettalji ta' kif nistgħu nikkuntattjawk fosthom l-indirizz, in-numru tal-mowbajl u indirizz tal-email;

• ikollu stqarrija personali fejn tistqarr li temmen ġenwinament li kif qed jintuża l-materjal li qed tilmenta dwaru mhux użu awtorizzat minn sid il-jedd tal-awtur, l-aġenti tiegħeu jew il-liġi; u

• tagħmel stqarrija fejn tistqarr li l-informazzjoni fl-avviż hija eżatta u li taħlef bil-liġi li għandek il-permess tirrappreżenta lil sid il-jedd tal-awtur.

Fi ftit kliem: Ara li l-kontenut kollu li tqiegħed fuq is-Servizzi jkun tiegħek jew li jkollok il-jedd li tużah. Nistgħu ngħalqulek il-kont jekk tuża l-kontenut ta' ħaddieħor mingħajr permess. Avżana jekk issib xi ħaġa li temmen li tikser il-jeddijiet tal-propjetà intellettwali tiegħek.

Aħna naħdmu ħafna biex is-Servizzi tagħna jkunu post sigur għall-utenti kollha. Imma ma nistgħux nagħtu garanzija li dejjem se jkunu hekk. Għalhekk neħtieġu l-għajnuna tiegħek. Meta tuża s-Servizzi tagħna tkun qed taqbel li dejjem se timxi ma' dawn ir-Regoli fosthom il-Linji Gwida tal-Komunità tagħna u kull politika oħra li Snap iddaħħal fis-seħħ biex iżżomm is-Servizzi siguri.

Jekk ma tagħmilx hekk, aħna għandna l-jedd li nneħħu l-kontenut kollu li jikser ir-Regoli; ngħalqu jew naħbu minn utenti oħra l-kont tiegħek; u li nżommu d-dejta marbuta mal-kont tiegħek skont il-politiki taż-żamma tad-dejta tagħna; u li navżaw lil persuni legali oħra — fosthom il-forzi taż-żamma tal-ordni — u nagħtu lil dawk il-persuni legali l-oħra informazzjoni marbuta mal-kont tiegħek. Dal-pass jaf ikun meħtieġ biex inħarsu s-sigurtà tal-utenti tagħna u ta' nies oħra, biex ninvestigaw, insewwu u nwettqu l-ksur tar-Regoli li jista' jseħħ u biex nagħrfu u nsewwu kull tħassib dwar qerq jew sigurtà.

Aħna nagħtu kas ukoll tas-sigurtà fiżika tiegħek int u tuża s-Servizzi tagħna. Għalhekk tużax is-Servizzi tagħna b'xi mod li jtellfek milli timxi mal-liġijiet tat-traffiku u tas-sigurà. Qatt m'għandek, pereżempju, tuża s-Servizzi int u ssuq. U qatt m'għandek tqiegħed lilek innifsek jew lil oħrajn fil-periklu biex tiġbed Snap jew biex tuża faċilitajiet oħra ta' Snapchat.

Fi ftit kliem: Aħna nippruvaw inżommu s-Servizzi tagħna kemm jista' jkun siguri imma biex nagħmlu hekk neħtieġu l-għajnuna tiegħek. Dawn ir-Regoli, il-Linji Gwida tal-Komunità tagħna u politiki oħra ta' Snap fihom informazzjoni importanti fuq kif tħares is-Servizzi u utenti oħra. U qatt m'għandek tqiegħed lilek innifsek jew lil oħrajn fil-periklu int u tuża s-Servizzi tagħna.

Jeħtieġlek toħloq kont biex tuża xi Servizzi. Għall-kont tiegħek taqbel li tagħtina informazzjoni preċiża, kompluta u aġġornata. Int responsabbli għal kull ħaġa li ssir fuq il-kont. Għalhekk importanti li tħares il-kont tiegħek. Mod wieħed ta' kif iżżomm il-kont tiegħek sigur huwa li tagħżel password b'saħħitha li ma tużax għal kontijiet oħra u li tixgħel- l-awtentikazzjoni b'żewġ passi. Jekk jogħġbok ikkuntattja lit-Tim tal-Għajnuna minnufih jekk taħseb li xi ħadd ieħor daħal fil-kont tiegħek. Kull software li nagħtuk jista' jniżżel u jinstalla l-aġġornamenti, t-tiġdid jew faċilitajiet ġodda oħra awtomatikament. Tista' tibdel l-għażliet ta' dan it-tniżżil awtomatiku mill-għażliet tat-tagħmir tiegħek. Int taqbel li ma tistax toħloq kont ġdid mingħajr il-permess tagħna jekk fl-imgħoddi neħħejna jew imblukkajna lilek jew lill-kont tiegħek minn xi wieħed mis-Servizzi tagħna.

Fi ftit kliem: Ħares id-dettalji tal-kont tiegħek. Tużax kontijiet li ma tajniekx permess tuża.

Memorji huwa s-servizz personalizzat tagħna għall-konservazzjoni tad-data. Il-kontenut ta' Memorji jista' ma jkunx disponibbli għal għadd ta' raġjunijiet fosthom problema fil-ħidma tas-servizz tagħna jew l-għażla min-naħa tagħna li ngħalqulek il-kont. Billi ma nistgħux nagħtuk garanzija li l-kontenut dejjem se jkun disponibbli, aħna nissuġġerulek iżżomm kopja oħra xi mkien ieħor tal-kontenut li terfa' f'Memorji. Ma nistgħux inwegħduk li Memorji se tkun tiflaħ taħżen il-kontenut li tixtieq. Għandna l-jedd li nillimitaw il-ħażna li tista' tuża għal Memorji jew li nimblukkaw xi xorta ta' kontenut milli jintużaw f'Memorji u nistgħu nibdlu dawn il-limiti u r-restrizzjonijiet minn jeddna minn żmien għal żmien.

Fi ftit kliem: Memorji huwa servizz personalizzat ta' konservazzjoni ta' data, se jingħatalek awtomatikament, imma tista' tikkontrolla ċertu faċilitajiet. Lanqas ma nistgħu nwegħduk li l-Memorji se jinħażnu għal dejjem għalhekk jekk jogħġbok aħżen kopja tagħhom.

Int għandek tħallas kull tariffa tal-mowbajl li teħel talli tuża s-Servizzi tagħna. Dawn it-tariffi jiġbru fihom it-tariffi tal-internet tal-mowbajl u t-tariffi għall-messaġġi bħal pereżempju SMSijiet, MMSijiet jew xorta oħra ta' messaġġi u teknoloġiji oħra (flimkien magħrufa bħala “Messaġġi”). Qabel tuża s-Servizzi għandek tistaqsi lill-operatur tas-servizzi tal-mowbajl tiegħek x'se jkunu dawk it-tariffi jekk ma tafx eżatt kemm jistgħu jitilgħu.

Meta tagħtina n-numru tal-mowbajl tiegħek tkun qed taqbel li, fost oħrajn, tirċievi l-Messaġġi marbuta mas-Servizzi mingħand Snap, fosthom messaġġi dwar l-offerti (meta tagħtina l-permess tiegħek jew meta nistgħu nagħmlu hekk bil-liġi), dwar il-kont tiegħek u dwar ir-relazzjoni tiegħek ma' Snap. Int taqbel li tirċievi dawn il-Messaġġi anki jekk in-numru tal-mowbajl tiegħek huwa rreġistrat fuq xi lista Do Not Call federali jew statali jew lista internazzjonali bħalha.

Jekk tibdel jew tneħħi n-numru tal-mowbajl li użajt biex toħloq kont, jeħtieġlek tibdel id-dettalji tal-kont tiegħek mill-Għażliet fi żmien 72 siegħa biex b'hekk ma nibagħtux il-messaġġi maħsuba għalik lil ħaddieħor.

Fi ftit kliem: Nistgħu nibagħtulek xi Messaġġi u jaf ikollok tħallas xi tariffi lill-operatur tal-mowbajl tiegħek meta tuża s-Servizzi tagħna.

Xi Servizzi jistgħu juru, jiġbru fihom jew jagħtu kontenut, dejta, informazzjoni, apps, faċilitajiet jew materjali minn persuni oħra (“Materjal ta' Persuni Oħra”), jagħtu ħoloq għal xi siti ta' persuni oħra jew iħalluk tuża s-servizzi ta' persuni oħra b'rabta ma' dawk is-Servizzi. Jekk tuża xi Materjal ta' Persuni oħra jew servizzi ta' persuni oħra b'rabta jew mis-Servizzi tagħna (fosthom is-Servizzi li noffru flimkien mal-persuna l-oħra), ir-regoli fis-seħħ tal-persuna l-oħra se jgħoddu għalik. La Snap u lanqas l-imsieħba tagħna mhuma responsabbli għar-regoli ta' persuna oħra jew għall-għemil li jaqa' taħt ir-regoli tal-persuna l-oħra. Barra minn hekk, meta tuża s-Servizzi tkun qed tagħraf u taqbel li Snap mhix responsabbli li tiċċekkja u tgħarbel il-kontenut jekk hux preċiż, komplut, disponibbli, ġdid, tajjeb, jekk iħarisx il-jeddijiet tal-awtur, jekk hux legali, diċenti, ta' kwalità jew kull ħaġa oħra marbuta ma' dan il-Materjal ta' Persuni oħra jew servizzi jew siti ta' persuni oħra. Aħna ma nagħtu l-ebda garanzija jew approvazzjoni u ma naċċettaw u lanqas se jkollna responsabbiltà lejn jew lejn nies oħra għas-servizzi ta' persuni oħra, għall-Materjal ta' Persuni Oħra jew għal siti ta' persuni oħra jew għal kull xorta ta' materjal, prodotti jew servizzi ta' persuni oħra. Il-Materjal ta' Persuni Oħra, id-disponibbiltà ta' servizzi u l-ħoloq lejn siti ta' persuni oħra qed jingħatawlek biss bħala forma ta' għajnuna.

Fi ftit kliem: Snap mhux responsabbli għall-faċilitajiet, għall-kontenut jew għas-servizzi ta' persuni oħra li tista' tasal għalihom permezz jew b'rabta mas-Servizzi tagħna – jekk jogħġbok ara li taqra r-regoli tal-persuni l-oħra.

Aħna l-ħin kollu naħdmu qatigħ biex intejbu s-Servizzi tagħna u noħolqu oħrajn ġodda. Dan ifisser li nistgħu nżidu jew inneħħu xi faċilitajiet, prodotti jew ħidmiet u nistgħu wkoll nissospendu jew intemmu s-Servizzi għal dejjem. Nistgħu nagħmlu hekk meta rridu għal kull xorta ta' raġuni u meta nagħmlu hekk nafu ma navżawkx qabel.

Dan ifisser ukoll li kultant ikun jeħtiġilna nibdlu dawn ir-Regoli biex naddattawhom għall-bidliet fis-Servizzi tagħna jew għal kif noffru dawk is-Servizzi kif ukoll biex nimxi mar-rekwiżiti legali jew għal raġunijiet legali jew ta' sigurtà oħra. Jekk dawk il-bidliet f'dawn ir-Regoli ikunu kbar, aħna se navżawk raġjonevolment bil-quddiem (sakemm dawk il-bidliet ma jkunux meħtieġa qabel pereżempju jekk ikun hemm xi bidla fil-liġijiet jew jekk inkunu qed inniedu xi Servizzi jew faċilitajiet ġodda). Jekk wara li dawk il-bidliet jidħlu fis-seħħ tkompli tuża s-Servizzi, aħna se nqisu li aċċettajt dawk il-bidliet.

Fi ftit kliem: Is-Servizzi tagħna se jinbidlu maż-żmien. Minn żmien għal żmien nistgħu nibdlu dawn ir-Regoli biex naddattawhom għal dawn il-bidliet jew għal raġunijiet oħra.

Għalkemm nittamaw li tibqa' utent ta' Snapchat għal ħajtek kollha, tista' tħoll ir-rabta minn dawn ir-Regoli meta trid jekk ma taqbilx mal-bidliet li nagħmlu f'dawk ir-Regoli jew għal kull raġuni oħra billi tħassar il-kont ta' Snapchat tiegħek (jew f'xi każijiet, il-kont marbut mal-parti tas-Servizzi li tkun qed tuża).

Jekk tikser dawn ir-Regoli, il-Linji Gwida tal-Komunità tagħna jew il-liġi, kemm għal raġunijiet barra l-kontroll tagħna kif ukoll għal raġunijiet oħra, nistgħu nillimitaw, inneħħu jew nissospendu għal ftit żmien l-aċċess tiegħek għas-Servizzi. Dan ifisser li nistgħu ntemmu dawn ir-Regoli, nieqfu nagħtu is-Servizzi tagħna jew parti minnhom jew indaħħlu fis-seħħ limiti ġodda jew miżjuda biex tkun tista' tuża s-Servizzi tagħna. Nistgħu pereżempju niddiżattivawlek il-kont jekk iddum ma tużah u nistgħu nieħdu lura l-isem tal-utent tiegħek meta rridu, tkun xi tkun ir-raġuni. U għalhekk se nagħmlu l-almu tagħna biex navżawk biżżejjed bil-quddiem, ma nistgħux nagħtuk garanzija li dejjem se nkunu nistgħu navżawk bil-quddiem.

Meta nillimitawlek, ngħalqulek jew nissospendulek l-aċċess għas-Servizzi minħabba ksur tal-Linji Gwida tal-Komunità tagħna, aħna se navżawk u se nagħtuk l-opportunità li tressaq appell.

Qabel nillimitawlek, ngħalqulek jew nissospendulek l-aċċess għas-Servizzi aħna se nqisu l-fatti u ċ-ċirkostanzi kollha skont l-informazzjoni li jkollna u skont ir-raġuni għaliex inkunu se nwettqu l-għemil tagħna. Jekk pereżempju tikser il-Linji Gwida tal-Komunità tagħna, aħna se nqisu l-gravità, kemm-il darba tkun ksirt dawn il-linji gwida u l-effett tal-ksur kif ukoll il-ħsieb wara l-ksur. Din l-informazzjoni se jgħinna nifhmu jekk għandniex nillimitawlek, ngħalqulek jew nissospendulek l-aċċess għas-Servizzi tagħna u jekk nagħżlu li nissospendulek l-aċċess, għal kemm tul ta' żmien se nagħmlu hekk. Tista' żżur is-Sit tal-Għajnuna tagħna biex issir taf iktar dwar kif inqisu u nirreaġixxu f'każ ta' użu mhux xieraq tas-Servizzi tagħna.

Ikun min ikun li jtemm dawn ir-Regoli, kemm int kif ukoll Snap tibqgħu marbuta b'Artiklu 2, Artiklu 3 (sakemm ir-regoli u l-kundizzjonijiet miżjuda jdumu, skont ma jgħidu huma, fis-seħħ) u minn Artikli 6 sa 24 tar-Regoli.

Fi ftit kliem: Tista' tieqaf tuża s-Servizzi jew tħassar il-kont tiegħek meta trid u għal kull raġuni, fosthom li ma taqbilx ma' xi bidliet f'dawn ir-Regoli. Nistgħu nillimitawlek jew inneħħulek l-aċċess għas-Servizzi minħabba r-raġunijiet imsemmija hawn fuq. Meta nagħmlu hekk, ħafna drabi se navżawk u se nagħtuk l-opportunità li tressaq appell.

Int taqbel li sakemm il-liġi tħallik tagħmel hekk, tagħmel tajjeb, tiddefendi, u tħoll mir-responsabbiltà ċivili lil Snap u l-imsieħba, id-diretturi, it-tmexxija, l-azzjonisti, il-ħaddiema, is-sidien tal-propjetà intellettwali u l-aġenti tagħna f'kull każ f'kull xorta ta' lment, akkuża, talba, danni, telf, nefqa, responsabbiltà legali, u spejjeż (fosthom l-ispejjeż tal-avukati) li jkollhom iħallsu, jew jeħlu, jew b'xi mod ikunu marbuta: (a) mal-fatt li għandek aċċess jew tuża s-Servizzi jew għal xi prodotti jew servizzi mogħtija minn persuna oħra b'rabta mas-Servizzi, anki jekk suġġeriti, mogħtija jew approvati minn Snap, (b) mal-kontenut tiegħek fosthom ix-xiljiet ta' ksur tar-regoli marbuta mal-kontenut tiegħek, (ċ) mal-ksur min-naħa tiegħek ta' dawn ir-Regoli jew ta' xi liġi jew regolament li obbligat/a timxi magħhom jew (d) man-negliġenza jew ma' mġiba ħażina li tkun saret bi ħsieb.

Fi ftit kliem: Taqbel li tagħtina kumpens jekk tagħmlilna xi ħsara jew twassal biex nagħmlu xi telf.

Aħna nagħmlu l-almu tagħna biex inżommu s-Servizzi jaħdmu mingħajr xkiel. Imma ma nagħtu l-ebda garanzija li se jirnexxielna.

DAWN IS-SERVIZZI QED JINGĦATAW MINGĦAJR GARANZIJA TAL-ĦIDMA TAS-SERVIZZ U MINGĦAJR GARANZIJA TAD-DISPONIBBILTÀ TAS-SERVIZZ U, SAKEMM NISTGĦU NAGĦMLU HEKK BIL-LIĠI, MINGĦAJR EBDA XORTA TA' GARANZIJA, LA DIRETTA U LANQAS MIFHUMA, FOST OĦRAJN, GARANZIJI MIFHUMA LI S-SERVIZZ HUWA LEST GĦAS-SUQ, LI ADDATTAT GĦAL XI SKOP PARTIKOLARI, GARANZIJI TA' SJIEDA U NUQQAS TA' KSUR TAR-REGOLI. BARRA MINN HEKK, GĦALKEMM NIPPRUVAW NAGĦTU LILL-UTENT ESPERJENZA SABIĦA, MA NAGĦMLUX STQARRIJIET U MA NAGĦTUX GARANZIJI LI: (A) IS-SERVIZZI DEJJEM SE JKUNU KOLLHA SIGURI, MINGĦAJR ŻBALJI JEW MOGĦTIJA FIL-ĦIN, (B) IS-SERVIZZI DEJJEM SE JAĦDMU MINGĦAJR DEWMIEN, XKIEL JEW PROBLEMI JEW (Ċ) KULL XORTA TA' KONTENUT JEW INFORMAZZJONI LI TIKSEB MIS-SERVIZZI SE TKUN AĠĠORNATA JEW EŻATTA.

LA AĦNA U LANQAS L-IMSIEĦBA TAGĦNA MA NIEĦDU JEW NAĊĊETTAW RESPONSABBILTÀ GĦAL XI KONTENUT LI INT, UTENT IEĦOR JEW PERSUNA OĦRA TOĦLOQ, ITTELLA', TIPPUBBLIKA, TIBGĦAT, TIRĊIEVI JEW TAĦŻEN FUQ JEW BIS-SERVIZZI TAGĦNA. INT TIFHEM U TAQBEL LI TISTA' TINTWERA KONTENUT LI JOFFENDI, ILLEGALI, QARRIEQI JEW B'XI MOD IEĦOR MHUX ADDATTAT U LI LA AĦNA U LANQAS L-IMSIEĦBA TAGĦNA MHU SE JKUNU RESPONSABBLI GĦALIH.

Fi ftit kliem: Snap se tipprova tagħtik is-Servizzi imma ma nistgħu nwegħduk xejn b'rabta mal-kwalità u mhux se nkunu responsabbli għall-kontenut li mhux tagħna.

SAFEJN JISTA' JKUN HEKK BIL-LIĠI, LA AĦNA U LANQAS IT-TMEXXIJA, L-AZZJONISTI, IL-ĦADDIEMA, L-IMSIEĦBA, IS-SIDIEN TAL-PROPJETÀ INTELLETTWALI, L-AĠENTI U L-FORNITURI TAGĦNA M'AĦNA SE NKUNU RESPONSABBLI GĦAL XI DANNI INDIRIETTI, AĊĊIDENTALI, SPEĊJALI, KONSEGWENZJALI, GĦADDIEBA JEW GĦADD TA' DANNI, JEW XI TELF TA' QLIGĦ JEW DĦUL, KEMM DIRETT KIF UKOLL INDIRETT, JEW XI TELF TA' DEJTA, UŻU, FAMA JEW TELF MHUX TANĠIBBLI MINĦABBA (A) LI TAĊĊESSA JEW LI MA TKUNX TISTA' TAĊĊESSA S-SERVIZZI, (B) L-IMĠIBA JEW IL-KONTENUT TA' UTENTI JEW PERSUNI OĦRA FUQ JEW BIS-SERVIZZI JEW (Ċ) AĊĊESS, UŻU JEW BIDLIA BLA PERMESS TAL-KONTENUT TIEGĦEK, ANKI JEKK INKUNU ĠEJNA AVŻATI DWAR IL-POSSIBBILTÀ TA' DANNI TA' DIX-XORTA. FL-EBDA KAŻ IS-SOMMA TAR-RESPONSABBILTÀ GĦAT-TALBIET KOLLHA MARBUTA MAS-SERVIZZ M'GĦANDHA TAQBEŻ L-IKBAR BEJN $100 USD JEW IS-SOMMA LI TKUN ĦALLASTNA FL-AĦĦAR 12-IL XAHAR QABEL ID-DATA TAL-GĦEMIL LI JWASSAL GĦAT-TALBA.

Fi ftit kliem: Nistgħu nillimitaw ir-responsabbiltà tagħna għal kull ħaġa li tagħmel, għal sitwazzjonijiet fejn ma tkunx tista' taċċessa s-Servizzi, għall-għemil tal-oħrajn u għal kull problema li toħroġ mill-użu mhux aċċettabbli tas-Servizzi tagħna. Fejn aħna nkunu responsabbli għad-danni u int tkun ġarrabt xi telf, ir-responsabbiltà tagħna hija limitata għal somma fissa.

JEKK JOGĦĠBOK AQRA DAWN IL-PARAGRAFI LI ĠEJJIN BIR-REQQA GĦAX JGĦIDU LI INT U SNAP TAQBLU LI KULL TILWIMA BEJNIETKOM TINQATA' B'ARBITRAĠĠ INDIVIDWALI LI JORBOT BIL-LIĠI U FIHOM DISPOŻIZZJONI GĦALL-ĦALL MILL-PROĊEDIMENTI KOLLETTIVI U ĦALL MINN KAWŻA BIL-ĠURIJA. Dan il-Ftehim tal-Arbitraġġ jieħu post il-verżjonijiet kollha ta' qablu.

a. Siwi tal-Ftehim tal-Arbitraġġ. F'dan l-Artiklu 19 (il-“Ftehim tal-Arbitraġġ”), int u Snap taqblu li kull talba u tilwima (kemm dawk imsejsa fuq kuntratt, dawk imsejsa fuq tort jew talbiet xorta oħra) fosthom it-talbiet u t-tilwim b'rabta ma' liġi, li ġejjin minn jew marbuta ma' dawn ir-Regoli jew l-użu tas-Servizzi jew xi messaġġi mibgħuta bejnek u bejn Snap li ma jitressqux quddiem tribunal għat-talbiet żgħar għandhom jinqatgħu minn arbitraġġ b'rabta legali individwali. Int u Snap m'intomx obbligati tarbitraw dawn li ġejjin: (i) tilwim jew talbiet li jaqgħu taħt it-tribunal għat-talbiet żgħar u li jkunu fil-ġurisdizzjoni tat-tribunal u mhux ikbar mil-limiti li jista' jiddeċiedi dwarhom it-tribunal, sakemm dawn it-talbiet ikunu tilwim individwali u mhux proċediment kollettiv, (ii) tilwim jew talbiet fejn l-unika ħaġa mitluba mit-tribunal hija inibizzjoni u (iii) tilwim fejn xi ħadd qed ifittex kumpens xieraq minħabba li qed jixli lill-persuna l-oħra bi ksur ta' jeddijiet tal-awtur, trademarks, ismijiet kummerċjali, logos, sigrieti kummerċjali, brevetti jew jeddijiet ta' propjetà intellettwali oħra. Biex inkunu ċari: il-frażi “it-talbiet u t-tilwim kollha” tiġbor fiha wkoll it-talbiet u t-tilwim li kien hemm bejnietna qabel id-data li fiha dawn ir-Regoli daħlu fis-seħħ. Minbarra dan, kull tilwima dwar jekk talba tistax tiġi arbitrata (fosthom it-tilwim dwar l-iskop, l-użu, it-twettiq, il-ħall jew il-validità tal-Ftehim tal-Arbitraġġ) se jinqata' mill-arbitru, sakemm ma dawn ir-Regoli hawn taħt ma jgħidux xorta oħra.

b. Ilħiq ta' Ftehim Informali l-Ewwel. Nixtiequ nieħdu ħsieb it-tilwim mingħajr il-ħtieġa ta' arbitraġġ. Jekk għandek xi tilwima ma' Snap li tista' tinqata' b'arbitraġġ, qabel tibda l-arbitraġġ taqbel li tibgħat talba personalizzata (“Talba Ta' Qabel l-Arbitraġġ”) lil Snap Inc., ATTN: Litigation Department, 3000 31st Street, Santa Monica, CA 90405 biex inkunu nistgħu naħdmu flimkien biex nilħqu ftehim. Talba ta' Qabel l-Arbitraġġ tistsa' tintuża biss għal talbiet marbuta ma', u f'isem, persuna waħda. Talba ta' Qabel l-Arbitraġġ imressqa f'isem għadd ta' persuni mhux se titqies bħala tajba għall-persuni kollha. It-Talba ta' Qabel l-Arbitraġġ għandha tkun magħmula minn: (i) ismek, (ii) l-isem tal-utent ta' Snapchat tiegħek, (iii) ismek, in-numru tal-mowbajl, l-indirizz tal-email u l-indirizz tal-posta jew l-isem, in-numru tal-mowbajl, l-indirizz tal-posta u l-indirizz tal-email tal-avukat tiegħek, jekk ikun il-każ, (iv) deskrizzjoni tal-ilment tiegħek u (v) il-firma tiegħek. Bl-istess mod, jekk Snap ikollha tilwima miegħek, Snap se tibgħatlek email jew messaġġ bit-Talba ta' Qabel l-Arbitraġġ personalizzata tagħha u bir-rekwiżiti msemmija hawn fuq fuq l-indirizz tal-email jew in-numru tal-mowbajl marbut mal-kont ta' Snapchat tiegħek. Jekk ma jintlaħaqx ftehim fi żmien sittin (60) jum mid-data li int jew Snap tibagħtu t-Talba ta' Qabel l-Arbitraġġ tagħkom, tistgħu tressqu talba għall-arbitraġġ. Int taqbel li biex tibda l-proċess tal-abitraġġ l-ewwel jeħtieġlek tagħmel dak li jitolbok tagħmel dan is-subartiklu u li l-arbitru għandu jiċħad kull talba ta' arbitraġġ imressqa li ma tkunx imxiet bis-sħiħ u mill-bidu sal-aħħar ma' dawn il-proċeduri għall-ilħiq ta' ftehim b'mod informali. Tgħix x'tgħid kull dispożizzjoni oħra ta' dan il-Ftehim, tal-Ftehim tal-Arbitraġġ jew tar-Regoli tas-Servizzi ta' ADR, il-persuna li kontriha jinfetaħ l-arbitraġġ se jkollha l-jedd li tikseb deċiżjoni tal-qorti dwar jekk l-arbitraġġ għandux jiġi miċħud minħabba li l-proċess tal-ilħiq tal-ftehim informali msemmija f'dan is-subartiklu ma jkunx ġie mwettaq.

ċ. Regoli tal-Arbitraġġ. Il-Federal Arbitration Act bid-dispożizzjonijiet tal-proċeduri tiegħu, u mhux il-liġi tal-istat, għandu jgħodd biex tiġi interpretata u mwettqa din id-dispożizzjoni għall-ilħiq ta' ftehim. Jekk wara li jitwettaq il-proċess tal-ilħiq ta' ftehim informali msemmi hawn fuq int jew Snap tkunu tixtiequ tibdew proċess ta' arbitraġġ, l-arbitraġġ għandu jitmexxa minn ADR Services, Inc. (“ADR Services”) (https://www.adrservices.com/). Jekk ADR Services ma tkun tista' tarbitra, l-arbitraġġ għandu jitmexxa minn National Arbitration and Mediation (“NAM) (https://www.namadr.com/). Kull ħaġa marbuta ma' dan l-arbitraġġ se taqa' taħt ir-regoli tat-tribunal għat-tilwim ħlief fejn dawn ir-Regoli imorru kontra dawk ir-regoli. L-arbitraġġ għandu jitmexxa minn arbitru newtrali wieħed. Għal kull talba jew tilwima fejn is-somma mitluba tkun inqas minn $10,000 USD, il-ftehim jista' jintlaħaq minn arbitraġġ b'rabta legali fejn il-partijiet ma jkollhomx għalfejn jidhru quddiem l-arbitru, dejjem skont ma tagħżel il-persuna li fetħet tilwima. Għal talbiet jew tilwim fejn is-somma mitlub tkun ta' $10,000 USD jew iktar, il-jedd għas-smigħ għandu jkun skont ir-regoli tat-tribunal tal-arbitraġġ. Kull deċiżjoni dwar kumpens mogħtija mill-arbitru tista' tiġi appellata quddiem kull qorti bil-ġurisdizzjoni metħieġa.

d. Regoli Miżjuda għall-Arbitraġġ Fejn il-Partijiet Ma Jidhrux Quddiem it-Tribunal. Jekk jingħażel arbitraġġ fejn il-partijiet ma jidhrux quddiem it-tribunal, l-arbitraġġ għandu jsir b'telefonata, fuq l-internet, bil-kitba jew b'taħlita tat-tlieta li huma; l-għażla tkun f'idejn min ressaq it-talba għall-arbitraġġ. Sakemm iż-żewġ naħat ma jaqblux xorta oħra, il-proċess tal-arbitraġġ mhux se jeħtieġ li xi ħadd mill-persuni jew mix-xhieda tagħhom jitla' quddiem it-tribunal.

e. Tariffi. Jekk tkun Snap li bdiet l-arbitraġġ kontrik, Snap se tħallas l-ispejjeż kollha marbuta mal-arbitraġġ, fosthom it-tariffa kollha tal-applikazzjoni. Jekk tkun int li bdejt arbitraġġ kontra Snap, int se tkun responsabbli li tħallas l-Ewwel Tariffa tal-Applikazzjoni (li ma titħallasx lura). Biss jekk is-somma tal-Ewwel Tariffa tal-Applikazzjoni tkun ikbar mis-somma li kieku tħallas biex tressaq Ilment fil-Qorti Distrettwali tal-Istati Uniti tal-Amerka għad-Distrett Ċentrali ta' California (jew għall-każijiet fejn dik il-qorti ma jkollhiex setgħa li tisma' l-każ, il-Qorti Suprema ta' California tal-Kontea ta' Los Angeles), Snap se tħallas id-differenza bejn l-Ewwel Tariffa tal-Applikazzjoni u s-somma li kieku kellek tħallas biex ressaq Ilment quddiem Qorti. Snap se tħallas it-Tariffa Amministrattiva taż-żewġ naħat. ADR Services għandha lista fissa ta' tariffi għas-servizzi tagħha li tista' ssibhom billi żżur https://www.adrservices.com/rate-fee-schedule/.

f. Setgħa tal-Arbitru. L-arbitru jagħżel il-ġurisdizzjoni tal-arbitru u l-jeddijiet u l-obbligi, jekk ikun il-każ, tiegħek u ta' Snap. It-tilwima ma tistax tingħaqad ma' ċirkostanzi oħra jew tingħaqad ma' każijiet jew persuni oħra. L-arbitru se jkollu s-setgħa li jiċħad xi parti mit-tilwima jew mill-ilment jew it-tilwima u l-ilment kollu. L-arbitru se jkollu s-setgħa li jagħti kumpens fi flus, kumpens mhux fi flus jew deċiżjonijiet oħra disponibbli għall-persuna skont il-liġi, skont ir-regoli tat-tribunal tal-arbitraġġ u skont ir-Regoli. L-arbitru se jagħti deċiżjoni bil-miktub u r-raġunijiet ta' warajhom fejn ifisser il-fatti u l-konklużjonijiet li sejjes il-kumpens fuqhom, fosthom kif inħadmu d-danni. L-arbitru se jkollu l-istess setgħa ta' mħallef f'qorti li jagħti kumpens lil xi parti. Id-deċiżjoni tal-arbitru hija aħħarija u torbot lilek u lil Snap.

ġ. Offerti ta' Ftehim u Offerti ta' Sentenza. Mill-inqas għaxart (10) ijiem tal-kalendarju qabel id-data tas-smigħ quddiem l-arbitru, int jew Snap tistgħu tibagħtu offerta ta' sentenza bil-miktub lin-naħa l-oħra biex titolbu li tingħata sentenza skont ċerti kundizzjonijiet. Jekk il-parti l-oħra taċċetta l-offerta, l-offerta u l-prova li l-parti l-oħra tkun aċċettat għandhom jintbagħtu lit-tribunal tal-arbitraġġ li se jagħti s-sentenza tiegħu skont dik l-offerta. Jekk l-offerta ma tiġi aċċettata qabel is-smigħ quddiem l-arbitru jew fi żmien tletin (30) jum tal-kalendarju wara li ssir, skont liema minnhom tiġi l-ewwel, din għadha titqies li tneħħiet u ma tistax tintuża bħala prova waqt l-arbitraġġ. Jekk offerta ġejja min-naħa waħda ma tiġix aċċettata min-naħa l-oħra u n-naħa l-oħra ma jirnexxielhiex tikseb sentenza aħjar minn dak tal-offerta, in-naħa l-oħra ma tistax titlob l-ispejjeż li tkun weħlet wara l-offerta u għandha tħallas l-ispejjeż li n-naħa l-oħra (fosthom it-tariffi kollha tat-tribunal tal-arbitraġġ) tkun weħlet wara li ntbagħtet l-offerta.

ħ. Ħall minn Kawża b'Ġurija. INT U SNAP IĊĊEDU KULL JEDD KOSTITUZZJONALI U LEGALI LI TMORRU QUDDIEM QORTI U LI JKOLLKOM KAWŻA QUDDIEM IMĦALLEF JEW ĠURIJA. Minflok, int u Snap qed tagħżlu li tilħqu ftehim għat-talbiet u t-tilwim bl-arbitraġġ. Il-proċeduri tal-arbitraġġ ħafna drabi huma iktar limitati, iktar effiċjenti u jiswew inqas flus mir-regoli tal-qorti u l-qorti ftit li xejn tista' taċċetta appelli minn deċiżjoni tal-arbitraġġ. Waqt il-proċess li bih int u Snap tkunu qed tagħmlu l-punti tagħhom dwar jekk tħollux jew twettqux il-kumpens ta' arbitraġġ, INT U SNAP SE ĊĊEDU L-JEDDIJIET KOLLHA GĦAL KAWŻA B'ĠURIJA u minflok se tagħżlu li d-deċiżjoni tittieħed minn imħallef.

i. Ħall mill-Proċedimenti Kollettivi. KULL TALBA U TILWIMA LI TAQA' TAĦT DAN IL-FTEHIM TAL-ARBITRAĠĠ GĦANDHA TIĠI ARBITRATA JEW ARGUMENTATA MINN PERSUNA WAĦIDHA U MHUX BĦALA PROĊEDIMENT KOLLETTIV. TALBIET IMRESSQA MINN IKTAR MINN KONSUMATUR JEW UTENT WIEĦED MA JISTGĦUX JIĠU ARBITRATI JEW ARGUMENTATI FLIMKIEN JEW MAGĦQUDA MA' TALBIET TA' XI KLIJENTI JEW UTENTI OĦRA. Dan is-subartiklu ma jwaqqafx lilek jew lil Snap milli tgawdu minn kumpens kollettiv għal xi talbiet. Tgħid x'tgħid kull dispożizzjoni oħra ta' dan il-Ftehim tal-Ftehim tal-Arbitraġġ jew tar-Regoli tas-Servizzi ta' ADR, it-tilwim marbut mal-interpretazzjoni, mal-iskop jew mat-twettiq ta' dan il-ħall jista' jingħata biss minn qorti u mhux min arbitru. JEKK DAN IL-ĦALL MINN PROĊEDITMENT KOLLETTIV JIĠI LIMITAT, JAQA' JEW JINSTAB LI MA JISTAX JITWETTAQ, SAKEMM IN-NAĦAT MA JAQBLUX XORTA OĦRA U T-TILWIMA TKUN TISTA' TIMXI 'L QUDDIEM BĦALA PROĊEDIMENT KOLLETTIV, IL-FTEHIM TAL-ARBITRAĠĠ SE JITQIES NULL U BLA SIWI FEJN JIDĦLU DAWN IX-XORTA TA' PROĊEDURI. F'DAWN IL-KAŻIJIET, IL-PROĊEDIMENT PUTATTIV, L-AVUKAT ĠENERALI PRIVAT JEW IL-PROĊEDIEMT MIĠBUR JEW RAPREŻENTATTIV LI JITĦALLA JSIR GĦANDU JINĠIEB QUDDIEM QORTI TAL-LIĠI U MHUX TRIBUNAL TAL-ARBITRAĠĠ.

j. Jedd għall-Ħall. Kull jedd u limitu misjub f'dan il-Ftehim tal-Arbitraġġ jista' jinħall min-naħa li t-tilwima tkun tressqet kontriha. Dan il-ħall mhux se jħoll jew jaffettwa xi parti oħra ta' dan il-Ftehim tal-Arbitraġġ.

k Għażla li ma tintrabatx bil-ftehim. Tista' tagħżel li ma tintrabatx b'dan il-Ftehim tal-Arbitraġġ. Jekk tagħmel hekk, int u Snap ma tistgħux iġġiegħlu lil xulxin tarbitraw. Biex tagħżel li ma tintrabatx b'dan il-ftehim jeħtieġlek tavża lil Snap bil-miktub qabel jgħaddu 30 jum mill-ewwel darba li tkun dħalt f'dan il-Ftehim tal-Arbitraġġ; inkella se tintrabat li tarbitra t-tilwim mingħajr proċedimenti kollettivi skont dawn ir-Regoli. Jekk tagħżel li ma tintrabatx bid-dispożizzjonijiet tal-arbitraġġ biss imma tintrabat bil-ħall mill-proċedimenti kollettivi, il-ħall mill-proċedimenti kollettivi xorta jibqa' fis-seħħ. Ma tistax tagħżel li ma tintrabatx bil-ħall mill-proċedimenti kollettivi imma tintrabat bid-dispożizzjonijiet tal-arbitraġġ. L-avviż tiegħek għandu jkun fih ismek u l-indirizz tiegħek, l-isem tal-utent ta' Snapchat tiegħek u l-indirizz tal-email li użajt biex toħloq il-kont ta' Snapchat tiegħek (jekk għandek) u stqarrija ċara li tixtieq tinħall minn dan il-Ftehim tal-Arbitraġġ. Jeħtieġlek tibgħat l-avviż li ma tridx tintrabat b'dan il-ftehim lil dan l-indirizz: Snap Inc., Attn: Arbitration Opt-out, 3000 31st Street, Santa Monica, CA 90405 jew tibagħtu b'email lil arbitration-opt-out @ snap.com.

l Tribunal għat-Tabliet Żgħar. Jgħidu xi jgħidu d-dispożizzjonijiet t'hawn fuq, kemm int kif ukoll Snap tistgħu tiftħu kawża fi tribunal għat-talbiet żgħar.

m. Il-Ftehim tal-Arbitraġġ: Żmien fis-Seħħ. Wara li ttemm ir-relazzjoni tiegħek ma' Snap, il-Ftehim tal-Arbitraġġ se jibqa' fis-seħħ. It-tneħħija tal-kunsens, l-għemil l-ieħor tiegħek biex ittemm is-sehem fis-Servizz u l-komunikazzjoni tiegħek ma' Snap se jibqgħu fis-seħħ ukoll.

Fi ftit kliem: Sakemm ma tagħżilx li ma tintrabatx bl-arbitraġġ, f'każ ta' tilwim jew talbiet, int u Snap se taslu għal ftehim billi l-ewwel tgħaddu minn proċess ta' lħiq ta' ftehim informali u jekk din il-ħaġa ma ssolvix il-problema, fuq bażi individwali permezz ta' arbitraġġ b'rabta legali bejn iż-żewġ naħat. Dan ifisser li ma tistax tibda proċedimenti kollettivi kontrina f'każ ta' talba jew tilwima.

Sa fejn dawn ir-Regoli jħallu lilek jew lil Snap tressaq ilment quddiem qorti, kemm int kif ukoll Snap taqblu li, ħlief għat-talbiet li għandhom jitressqu quddiem tribunal għat-talbiet żgħar, it-talbiet u l-ilmenti kollha (kemm marbuta ma' kuntratt, tort jew xorta oħra ta' lmenti), fosthom it-talbiet u l-ilmenti msejsa fuq il-liġi, li ġejjin minn jew marbuta mar-Regoli jew l-użu tas-Servizzi, se jinġiebu biss quddiem il-Qorti Distrettwali tal-Istati Uniti tal-Amerka għad-Distrett Ċentrali ta' California. Biss jekk dik il-qorti ma tkunx tista' tisma' l-ilment, kull talba jew ilment għandhom jinġiebu biss quddiem il-Qorti Superjuri ta' California tal-Kontea ta' Los Angeles. Int u Snap taċċettaw il-ġurisdizzjoni personali taż-żewġt iqrati.

Safejn il-liġijiet federali tal-Istati Uniti tal-Amerka ma jgħidux xorta oħra, dawn ir-Regoli u t-talbiet u l-ilmenti (kemm dawk marbuta ma' kuntratti, ma' tort jew xorta oħra ta' lmenti) l-oħra ġejjin minn jew marbuta ma' dar-Regoli jew is-suġġett tagħhom jaqgħu taħt il-liġijiet ta' California (bl-eċċezzjoni tal-prinċipji tal-kunflitt tal-liġijiet tagħhom).

Jekk xi dispożizzjoni ta' dawn ir-Regoli titqies li ma tistax titwettaq, dik id-dispożizzjoni se titneħħa minn dawn ir-Regoli u mhux se taffettwa l-validità u t-twettiq tal-bqija tad-dispożizzjonijiet.

Jekk int resident ta' California, skont Artiklu 1789.3 tal-Kodiċi Ċivili ta' California, tista' tressaq l-ilmenti tiegħek lill-Compliant Assistant Unit tad-Dipartiment tas-Servizzi għall-Klijenti tad-Dipartiment tal-Ħarsien tal-Konsumatur ta' California billi tiktbilhom fuq l-indirizz 1625 North Market Blvd., Suite N 112 Sacramento, CA 95834 jew billi ċċemplilhom fuq +1 (800) 952-5210.

Dawn ir-Regoli, fosthom ir-regoli miżjuda msemmija f'Artiklu 3, huma l-ftehim kollu bejnek u bejn Snap u jieħdu post kull ftehim ieħor milħuq qabel. Dawn ir-Regoli ma joħolqu jew jagħtu l-ebda jedd għall-persuni li mhux parti mill-ftehim. Jekk ma nwettqux xi dispożizzjoni ta' dawn ir-Regoli, ma jfissirx li ċedejna l-jedd tagħna li nwettqu dawn ir-Regoli. Għandna l-jedd li ngħaddu l-jeddijiet tagħna skont dawn ir-Regoli lil ħaddieħor u li sakemm dik il-persuna legali timxi ma' dawn ir-Regoli, li noffru s-Servizzi minn persuna legali oħra. Ma tistax tgħaddi l-ebda wieħed mill-jeddijiet jew l-obbligi tiegħek skont dawn ir-Regoli lil ħaddieħor mingħajr il-kunsens tagħna. Aħna nżommu l-jeddijiet kollha li ma tajniekx bl-iktar mod ċar. Fejn tajna taqsimiet fejn fissirna dawn ir-Regoli fi ftit kliem, dawn it-tifsiriet fil-qosor ingħataw biss biex inħaffu l-fehim tiegħek. Biex tifhem il-jeddijiet u l-obbigi legali tiegħek jeħtieġlek taqra dawn ir-Regoli mill-bidu sal-aħħar.

Snap tapprezza l-kummenti, il-mistoqsijiet, it-tħassib u s-suġġerimenti tiegħek kollha. Tista' tikkuntattjana jew titlobna l-għajnuna minn hawn.

L-indirizz uffiċjali ta' Snap Inc. huwa 3000 31st Street, Santa Monica, California 90405.

Ktibna dawn ir-Regoli tas-Servizz (li se nsejħulhom “Regoli”) biex tkun taf ir-regoli li jirregolaw is-sħubija tagħna miegħek bħala utent ta' Snapchat, Bitmoji jew kwalunkwe prodotti jew servizzi oħra tagħna li huma suġġett għal dawn ir-regoli, bħal My AI, (li nirreferu għalihom kollettivament bħala “Servizzi”). Is-Servizzi tagħna huma ppersonalizzati u nipprovdu informazzjoni dwar kif jaħdmu taħt dawn ir-Regoli, fiċ- Ċentru tal-Privatezza u s-Sigurtà, fuq is- Sit ta' Appoġġ u fis-Servizzi tagħna (bħal notifiki, kunsensi u "Settings"). L-informazzjoni li nagħtu hija s-suġġett ewlieni ta' dawn ir-Regoli.

Għalkemm għamilna l-almu tagħna biex niktbu dawn ir-Regoli bi kliem ħafif, hemm xi sezzjonijiet li se jinqraw qishom kuntratt tradizzjonali. Hemm raġuni tajba għal dan: dawn ir-Regoli huma ftehim b'rabta legali bejnek u bejn Snap Group Limited (“Snap”). Għalhekk jekk jogħġbok aqrahom sew.

Biex tuża s-Servizzi tagħna jeħtieġlek taċċetta dawn ir-Regoli (u kull tagħrif jew kunsens mitlub ieħor), li huma ppreżentati lilek meta tibda tuża s-Servizz għall-ewwel darba. Meta tagħmel hekk, Snap tagħtik liċenzja li ma tistax tgħaddiha lil ħaddieħor, li mhix esklussiva għalik u li ma tistax taqsam parti minnha ma' persuni oħra biex tuża s-Servizzi skont dawn ir-Regoli u l-politiki tagħna. Ovjament, jekk ma taċċettax ir-Regoli, tużax is-Servizzi.

Dawn ir-Regoli jgħoddu għalik jekk tgħix barra l-Istati Uniti tal-Amerka jew jekk in-negozju tiegħek mhux ibbażat ġewwa l-Istati Uniti tal-Amerka. Jekk tgħix ġewwa l-Istati Uniti tal-Amerka jew jekk in-negozju tiegħek huwa bbażat ġewwa l-Istati Uniti tal-Amerka, is-Servizzi se jingħatawlek minn Snap Inc. u l-ftehim fis-seħħ se jkun ir-Regoli tas-Servizz ta' Snap Inc.

AVVIŻ DWAR L-ARBITRAĠĠ: JEKK QED TUŻA S-SERVIZZI F'ISEM NEGOZJU, IN-NEGOZJU TIEGĦEK HUWA MARBUT BIL-KLAWŻOLA TAL-ARBITRAĠĠ LI SE SSIB IKTAR 'IL QUDDIEM F'DAWN IR-REGOLI.

Is-Servizzi tagħna mhumiex immirati għat-tfal taħt l-età ta' 13-il sena, u jeħtieġ tikkonferma li għandek 13-il sena jew iktar biex toħloq kont u tuża s-Servizzi. Jekk insiru nafu li int taħt l-età ta' 13-il sena (jew l-età minima meħtieġa biex persuna tuża s-Servizzi mingħajr il-permess tal-ġenituri fl-istat, fil-provinċja jew fil-pajjiż tiegħek, jekk ikbar), nieqfu nipprovdu s-Servizzi tagħna u se nħassru l-kont u d-data tiegħek. Nistgħu noffru Servizzi oħra b'regoli addizzjonali li jafu jeħtieġu li tkun ikbar minn 13-il sena biex tużahom. Għalhekk jekk jogħġbok aqra r-regoli kollha sew. Meta tuża s-Servizzi, qed tikkonferma (u tistqarr u tagħti garanzija) li:

• għandek is-setgħa legali tidħol fi ftehim b'rabta legali ma' Snap;

• m'intix persuna li huwa pprojbit milli juża s-Servizzi skont il-liġijiet tal-Istati Uniti tal-Amerka, tar-Renju Unit jew xi ġurisdizzjoni oħra applikabbli — fosthom, pereżempju, li ma tissemmiex fuq il-lista Specially Designated Nationals tad-Dipartiment tat-Teżor Amerikan jew xi restrizzjoni oħra bħal din;

• qatt ma nstabt ħati/ħatja ta' reati sesswali; u

• se tikkonforma ma' dawn ir-Regoli (fosthom kwalunkwe regoli u politiki oħra msemmija f'dawn ir-Regoli bħall- Linji Gwida tal-Komunità, il- Linji Gwida għall-Mużika fuq Snapchat u l- Politika tal-Kontenut Kummerċjali) u l-liġijiet, ir-regoli u r-regolamenti lokali, statali, nazzjonali u internazzjonali kollha li obbligat/a timxi magħhom.

Jekk qed tuża s-Servizzi f'isem negozju jew xi persuna legali oħra, int tikkonferma li għandek permess li torbot lil dak in-negozju jew persuna legali li timxi ma' dawn ir-Regoli u taqbel ma' dawn ir-Regoli f'isem dak in-negozju jew persuna legali (u li kull darba li nużaw il-kelma “int” u “tiegħek” f'dawn ir-Regoli nkunu qed infissru kemm int bħala utent privat kif ukoll dak in-negozju jew persuna legali).

Fi ftit kliem: Is-Servizzi tagħna mhux maħsuba għal nies taħt it-13-il sena jew li għadhom m'għalqux is-snin meħtieġa biex ikunu jistgħu jużaw is-Servizzi fl-istat, fil-provinċja jew fil-pajjiż tagħhom jekk din l-età hija ikbar minn 13-il sena. Jekk insiru nafu li m'għandekx l-età meħtieġa se nissospendulek is-Servizzi u se nħassru l-kont u d-dejta tiegħek. Jaf ikun hemm xi regoli oħra fis-seħħ għas-Servizzi tagħna u dawn ir-regoli jeħtiġuk li tkun ikbar biex tuża dawn is-Servizzi għalhekk jekk jogħġbok aqrahom bir-reqqa meta nitolbuk tagħmel hekk.

Ħafna mis-Servizzi tagħna jħalluk toħloq, ittella', tippubblika, tibgħat, tirċievi u taħżen il-kontenut. Meta tagħmel hekk, l-ewwel ħaġa hi li int iżżomm kull jedd ta' sjieda li kellek għall-kontenut filwaqt li tagħtina liċenzja biex nużaw dak il-kontenut. Kemm tkun wiesgħa l-liċenzja jiddependi mis-Servizzi li tuża u l-għażliet li tkun għażilt.

Għall-kontenut kollu li tibgħat fuq is-Servizzi (fosthom il-Kontenut Pubbliku), int tagħti lil Snap u lill-imsieħba tagħna liċenzja dinjija, mingħajr royalties (jiġifieri li m'għandniex għalfejn inħallsuk kull meta nużaw il-kontenut), li tista' titwettaq minn ħaddieħor u li nistgħu ngħadduha lil ħaddieħor biex inżommu, naħżnu, naħżnu kopja, nużaw, nuru, nibdlu, naddattaw, neditjaw, nippubblikaw, nifhmu, nxandru u nqassmu dak il-kontenut. Il-liċenzja tingħata biex inħaddmu, niżviluppaw, nagħtu, nirriklamaw u ntejbu s-Servizzi u biex noħorġbu b'servizzi ġodda u niżviluppawhom. Din il-liċenzja tagħtina l-jedd li naqsmu l-kontenut tiegħek u ngħaddu dawn il-jeddijiet lil operaturi tas-servizzi li għandha ftehim magħhom, biex jagħtuna s-Servizzi tagħhom, biex jagħtuna s-Servizzi tagħhom biss.

L-Istejjer Pubbliċi u l-kontenut kollu l-ieħor li tibgħat lis-Servizzi pubbliċi tagħna bħal pereżempju l-Profili Pubbliċi, Spotlight, il-Mappa ta' Snap jew Lens Studio nsejħulhom “Kontenut Pubbliku”. Billi l-Kontenut Pubbliku huwa minnu nniffsu pubbliku, int tagħti lil Snap, lill-imsieħba tagħha, lil utenti oħra ta-Servizzi u lill-imsieħba kummerċjali tagħna liċenzja u jedd dinjija, mingħajr royalties li, għal dejjem, nistgħu nużaw ix-xogħol tiegħek biex noħolqu xogħlijiet oħra minnu u nirriklmaw, nuru, nxandru, nuru fuq pjattaformi oħra, nippupjaw, inqassmu, nissinkronizzaw, inqiegħdu xi grafika jew ħsejjes fuq, inxandru pubblikament u nuru pubblikament kull parti tal-Kontenut Pubbliku tiegħek f'kull forma u fuq kull mezz tax-xandir jew tat-tqassim, kemm mezzi li nafu bihom issa u dawk li għadhom iridu jinħolqu. Din il-liċenzja tgħodd għall-vidjos, l-istampi, l-ħsejjes u l-kompożizzjonijiet mużikali li jinsabu fil-Kontenut Pubbliku tiegħek kif ukoll għall-isem, l-istampa, id-dehra u l-leħen ta' kull minn jidher fil-Kontenut Pubbliku li toħloq, ittella', tippubblika, tibgħat jew tidher fih (fosthom kif jintwerew fil-Bitmoji tiegħek). Dan ifisser li, fost l-oħrajn, mhux se jkollok jedd għal ebda kumpens jekk il-kontenut, il-vidjos, ir-ritratti, il-ħoss, il-kompożizzjonijiet mużikali, l-isem, l-istampa, id-dehra jew il-leħen tiegħek jintużaw minna, mill-imsieħba tagħna, mill-utenti tas-Servizzi jew mill-imsieħba kummerċjali tagħna. Il-liċenzji li tagħtina għall-Kontenut Pubbliku jibqgħu fis-seħħ sakemm il-Kontenut Pubbliku jkun fuq is-Servizzi u għal żmien raġjonevoli wara li tneħħi jew tħassar il-Kontenut Pubbliku mis-Servizzi (biss nistgħu nżommu l-kopji tal-Kontenut Pubbliku tiegħek fuq is-servers għal dejjem). Għal iktar informazzjoni fuq kif tagħżel min jista' jara l-kontenut tiegħek, jekk jogħġbok aqra l-Politika tal-Privatezza u s-Sit tal-Għajnuna tagħna. Il-Kontenut Pubbliku kollu għandu jkun addattat għal mill-inqas dawk li għalqu t-13-il sena.

Sakemm tista' tagħmel hekk skont il-liġi, int iċċedi għal kollox kull — jew taqbel li ma tippretendi kontra Snap jew l-imsieħba tagħha l-ebda — jedd morali jew jeddijiet oħra li jista' jkollok madwar id-dinja marbuta mal-kontenut li taqsam fuq is-Servizzi.

Għalkemm m'aħniex obbligati nagħmlu hekk, għandna l-jedd li niftħu, niċċekkjaw, ngħarblu u nħassru l-kontenut kollu: (i) li naħsbu li jmur kontra dawn ir-Regoli jew xi liġijiet li obbligati nimxu magħhom, fosthom ir-regoli miżjuda msemmija f'Artiklu numru 3, jew il-politiki tagħna bħall-Linji Gwida għall-Komunità tagħna jew (ii) obbligati nagħmlulu hekk minħabba l-liġijiet li obbligati nimxu magħhom. Biss, int biss se tkun responsabbli għall-kontenut li toħloq, ittella' tippubblika, tibgħat jew taħżen bis-Servizzi tagħna.

Aħna, Snap Inc. u l-imsieħba tagħna nistgħu nqiegħdu r-riklami fuq is-Servizzi, fosthom riklami personalizzati — bil-permess tiegħek, fejn meħtieġ — skont l-informazzjoni li taqsam magħna, li niġbru jew li niksbu dwarek. Kultant xi riklami jafu jidhru qrib, bejn, fuq jew fil-kontenut tiegħek.

Dejjem nieħdu gost meta l-utenti tagħna jiktbulna. Biss jekk taqsam magħna xi ħsibijiet, kummenti jew suġġerimenti, żomm f'moħħok li nistgħu nużawhom mingħajr ma nagħtuk ebda kumpens u mingħajr ebda restrizzjoni jew obbligi lejk. Int taqbel li aħna jkollna kull jedd ta' kull ħaġa li noħolqu skont dawn il-ħsibijiet, kummenti jew suġġerimenti.

Fi ftit kliem: Jekk ittella' l-kontenut tiegħek fuq is-Servizzi, int tibqa' s-sid imma tkun qed tagħti permess lilna u lil oħrajn biex nużawh biex noffru u nġibu 'l quddiem is-Servizzi tagħna. Tkun qed tagħti permess ukoll li utenti oħra jaraw u, f'xi każijiet, jużaw il-kontenut kollu li taqsam mal-oħrajn fuq is-Servizzi. Anki jekk għandna għadd ta' jeddijiet li nibdlu u nneħħu l-kontenut tiegħek, int dejjem se tkun responsabbli għal kull ħaġa li toħloq, tippubblika jew taqsam.

Xi regoli u kundizzjonijiet addizzjonali msemmija fuq il-paġna Regoli u Politiki ta' Snap jew li b'xi mod ieħor huma provduti għalik jistgħu japplikaw għall-Servizzi speċifiċi. Jekk tuża dawk is-Servizzi, allura dawk ir-regoli miżjuda jistgħu jgħoddu għalik u għalhekk jibdew jitqiesu bħala parti minn dawn ir-Regoli. Pereżempju, jekk tixtri jew tuża xi faċilitajiet bil-ħlas li nipprovdulek fuq Snapchat (bħal abbonament Snapchat+ jew Tokens, imma esklużi s-servizzi ta' reklamar), tkun qed taqbel li r- Regoli tal-Faċilitajiet bil-Ħlas tagħna japplikaw. Jekk xi waħda mir-regoli miżjuda tmur kontra dawn ir-Regoli, ir-regola miżjuda se titqies dik it-tajba u se tgħodd minflok dawn ir-Regoli sakemm qed tuża s-Servizzi marbuta ma' dawk ir-regoli miżjuda.

Fi ftit kliem: Jaf ikun hemm xi regoli oħra li jgħoddu għalik, jekk jogħġbok ħu ftit ħin biex taqrahom sew.

Il-privatezza tiegħek importanti għalina. Tista' taqra l-Politika tal-Privatezza tagħna biex issir taf kif nipproċessaw l-informazzjoni tiegħek int meta tuża s-Servizzi tagħna.

Is-Servizzi tagħna jipprovdu esperjenza personalizzata biex ikunu iktar relevanti u ta' interess ikbar għalik. Se nirrakkomandawlek kontenut, reklamar u informazzjoni oħra bbażati fuq dak li nafu jew dak li, minn kif tuża s-Servizzi tagħna, nistgħu nissoponu dwar l-interessi tiegħek u ta' oħrajn. Huwa meħtieġ għalina li nimmaniġġjaw l-informazzjoni personali tiegħek għal dan l-iskop, kif nispjegaw fil-Politika tal-Privatezza tagħna. Sakemm ma tagħżilx inqas personalizzazzjoni mis-Servizzi, il-personalizzazzjoni hija waħda mill-kundizzjonijiet tal-kuntratt tagħna miegħek biex inkunu nistgħu nagħmlu hekk. Tista' żżur is-Sit ta' Appoġġbiex tikseb iktar dettalji dwar ir-rakkomandazzjonijiet personalizzati.

Fi ftit kliem: Is-Servizzi tagħna jagħtuk esperjenza personalizzata, inkluż reklamar u rakkomandazzjonijiet oħra għalik bbażati fuq id-data li niġbru skont kif spjegat kemm hawn kif ukoll fil-Politika tal-Privatezza tagħna.

Il-biċċa l-kbira tal-kotenut fuq is-Servizzi tagħna jinħoloq mill-utenti, mill-pubblikaturi u minn persuni oħra barra l-kumpanija tagħna. Kemm jekk dak il-kontenut jitpoġġa pubblikament jew jintbagħat privatament, il-kontenut huwa r-responsabbiltà unika tal-utent jew tal-entità li ssottomettiewh. Għalkemm Snap tirriserva d-dritt li tirrevedi, timmodera jew tneħħi l-kontenut kollu li jidher fuq is-Servizzi, aħna ma nirrevedux dan kollu. Allura ma nistgħux - u ma nagħtux - garanzija li utenti oħra jew il-kontenut li jipprovdu permezz tas-Servizzi se jikkonformaw mat-Termini, il-Linji Gwida tal-Komunità jew it-termini, il-politiki jew il-linji gwida l-oħra tagħna. Tista' żżur is-Sit tal-Għajnuna tagħna biex issir taf iktar dwar kif Snap tgħarbel il-kontenut.

L-utenti jistgħu jirrappurtaw kontenut maħluq minn oħrajn jew kontijiet ta' oħrajn għal ksur tar-Regoli, tal-Linji Gwida tal-Komunità u ta' linji gwida u politiki oħra. Tista' żżur is-Sit tal-Għajnuna tagħna għal iktar informazzjoni fuq kif tirrapporta l-kontenut u l-kontijiet.

Għalkemm nittamaw li tifhem kull deċiżjoni li nieħdu dwar il-kontenut jew il-kontijiet tal-utenti, jekk ikollok xi lmenti jew tħassib tista' tibgħathomlna mill-formola li tista' ssib minn hawn jew tuża l-għażliet li se ssib fl-app. Jekk tuża dan il-proċess, l-ilment tiegħek għandu jintbagħat fi żmien sitt xhur mit-teħid ta' dik id-deċiżjoni li tkun qed tilmenta dwarha.

Hekk kif nirċievu l-ilment tiegħek aħna se:

• niżguraw li l-ilment jitqies fil-ħin, mingħajr diskriminazzjoni, bir-reqqa u skont il-proċess;

• nreġġgħu lura d-deċiżjoni tagħna jekk insibu li kellna żball; u

• navżawk minnufih bid-deċiżjoni li nkunu ħadna u jekk tistax tagħmel xi ħaġa biex tibdel l-affarijiet.

Fi ftit kliem: Il-biċċa l-kbira tal-kontenut fuq is-Servizzi huwa ta' jew huwa kkontrollat minn oħrajn u aħna m'għandna l-ebda kontroll jew responsabbiltà fuqu. Għandna politiki u proċessi għall-għarbiel tal-kontenut fis-seħħ li jgħoddu għall-kontenut fuq is-Servizzi.

Skont il-ftehim tagħna, Snap hija sid is-Servizzi li jiġbru fihom id-ditti, ix-xogħlijiet, l-avatars Bitmoji li tibni, is-software u l-kontenut, il-faċilitajiet u t-teknoloġija l-oħra tagħna marbuta magħhom.

Jeħtieġlek tħares il-jeddijiet ta' Snap u timxi mal-Linji Gwida tad-Ditta ta' Snapchat, mal-Linji Gwida tad-Ditta ta' Bitmoji u mal-linji gwida, mal-paġni tal-għajnuna jew mal-Mistoqsijiet Komuni l-oħra ppubblikati minn Snap jew l-imsieħba tagħna. Dan ifisser li, fost l-oħrajn, ma tistax tipprova, tgħin jew tħeġġeġ lil ħaddieħor jagħmel dawn li ġejjin u li jekk tagħmel hekk aħna nistgħu nissospendu jew inneħħulek l-aċċess għas-Servizzi:

• uża l-marki tad-ditta, il-logos, l-ikoni, id-disinn tal-interfaċċa għall-utent, id-dehra u l-preżentazzjoni tad-ditta, id-disinji, ir-ritratti, il-vidjos jew xorta ta' materjal ieħor li Snap tuża fis-Servizzi ħlief dawk li dawn ir-Regoli, il-Linji Gwida tad-Ditta ta' Snapchat, il-Linji Gwida tad-Ditta ta' Bitmoji jew il-linji gwida tad-ditta l-oħra ppubblikati minn Snap jew l-imsieħba tagħna jagħtuk permess ċar li tuża;

• b'xi mod tikser il-jeddijiet tal-awtur, il-marki kummerċjali jew xi jeddijiet tal-propjetà intellettwali oħra anki jekk tuża s-Servizzi biex tibgħat, turi, tippubblika jew toħloq xi xorta ta' kontenut li jikser dawn il-jeddijiet;

• tikkopja, tibdel, taħżen, tniżżel, ittella', taqsam, ixxerred, tbigħ, tikri, turi fuq pjattaformi oħra, ixxandar, turi, tagħti kopja, tuża f'xogħol ieħor jew b'xi mod ieħor tuża s-Servizzi jew il-kontenut fuq is-Servizzi, bl-eċċezzjoni tal-fajls temporanji li jinżammu awtomatikament mill-brawżer tal-internet tiegħek biex ikun jista' jurik il-kontenut, b'mod li jmur kontra dak li għandek permess ċar għalih f'dawn ir-Regoli u li ma nkunux tajniek permess bil-miktub tagħmel hekk jew is-Servizz ma jkunx ħalliek tagħmel hekk bi ħsieb;

• toħloq kont ieħor jekk diġà ddiżattivajnielek il-kont tiegħek, tipprova tuża s-Servizzi minn apps mhux uffiċjali mingħajr permess, titlob id-dettalji għad-dħul fil-kont ta' utenti oħra jew tixtri, tbigħ jew tikri l-aċċess għall-kont tiegħek, għal isem tal-utent, għall-iSnaps jew għal ħolqa tal-ħbieb;

• tistudja t-teknikalitajiet tal-prodott, tikkopja, iżżarma l-kodiċi, iżżarma l-programm jew issib kif jaħdmu s-Servizzi (fosthom il-ħsieb jew l-algoritmu ta' warajhom) jew b'xi mod tikseb il-kodiċi tas-software tas-Servizz;

• tuża xi robot, brimba, għakrux, kissieb tad-dejta jew mezzi jew sistemi awtomatiċi oħra biex tikseb aċċess għas-Servizzi jew tikseb id-dettalji dwar l-utenti l-oħra;

• tuża jew tibni xi apps mhux uffiċjali li jaħdmu mas-Servizzi jew li jużaw xi kontenut jew informazzjoni oħra tal-utenti mingħajr il-permess bil-miktub tagħna;

• tuża s-Servizzi b'mod li jista' jfixkel, iħarbat, jolqot ħażin jew ma jħallix lil utenti oħra milli jagħmlu użu sħiħ mis-Servizzi jew b'mod li jista' jagħmel ħsara, jiddiżattiva, jgħabbi żżejjed jew ma jħallix lis-Servizzi jaħdmu;

• ittella' xi virus jew kodiċi qarrieqi ieħor jew b'xi mod tnaqqas, taqbeż jew iddur mas-sigurtà tas-Servizzi;

• tipprova ddur ma' xi tekniki li nużaw biex niffiltraw il-kontenut jew tipprova tidħol f'żoni jew tuża faċilitajiet tas-Servizz li m'għandekx permess tuża;

• tfittex, tqalleb jew tipprova ssib xi problema tas-sigurtà fis-Servizzi jew f'xi sistema jew netwerk tagħna;

• tikser xi liġi jew regola li obbligat/a timxi magħha meta tiftaħ jew tuża s-Servizzi; jew

• tiftaħ jew tuża s-Servizzi b'xorta ta' mod li m'għandekx permess ċar li tużah hekk skont dawn ir-Regoli jew il-Linji Gwida tal-Komunità tagħna.

Fi ftit kliem: Aħna s-sidien tal-kontenut, tal-faċilitajiet u tal-ħidmiet kollha tas-Servizzi u nikkontrollawhom kollha aħna. Biex inħarsu s-Servizzi u l-utenti l-oħra mill-ħsara, hemm xi regoli li neħtiġuk timxi magħhom meta tuża s-Servizzi tagħna. Jekk ma timxix ma' dawn ir-regoli, il-kont tiegħek jista' jiġi sospiż jew jitneħħa.

Snap tħares id-drittijiet tal-oħrajn. U int għandek tagħmel l-istess. Għalhekk ma tistax tuża s-Servizzi, jew tgħin lil xi ħadd ieħor juża s-Servizzi, b'mod li jmur kontra jew jikser id-drittijiet tal-personalità, tal-privatezza, tal-awtur, tat-trademark jew tal-proprjetà intellettwali ta' ħaddieħor. Meta tibgħat xi kontenut lil Servizzi, int biss responsabbli li tiżgura u għandek tiżgura li dak il-kontenut huwa tiegħek, jew li rċevejt il-permessi u l-awtorizzazzjonijiet kollha meħtieġa biex tkun tista' tibgħat kontenut fuq is-Servizzi (fosthom, jekk ikun il-każ, id-dritt li toħloq riproduzzjonijiet mekkaniċi ta' xogħol mużikali f'xi rekords tal-awdjo, li tissinkronizza xi kompożizzjoni ma' kwalunkwe kontenut, li turi xi kompożizzjonijiet jew rekords tal-awdjo pubblikament, jew kwalunkwe dritt ieħor fis-seħħ għall-mużika li tinkludi fil-kontenut tiegħek li mhux provdut minn Snap) u tagħti d-drittijiet u l-liċenzji msemmija f'dawn ir-Regoli għall-kontenut tiegħek lil Snap. Taqbel ukoll li mhux se tuża jew tipprova tuża xi kont ta' utent ieħor b'mod li jmur kontra l-permess mogħti lilek minn Snap jew l-imsieħba tagħha.

Snap tirrispetta l-liġijiet tad-drittijiet tal-awtur, inkluż id-Digital Millenium Copyright Act u tieħu passi raġjonevoli biex tneħħi b'mod effiċjenti mis-servizzi tagħna kwalunkwe materjal li ssib li qed jikser dawn id-drittijiet meta nsiru nafu bihom. Jekk Snap issir taf li utent kiser id-drittijiet tal-awtur għal għadd ta' drabi, aħna se nieħdu l-passi raġjonevoli li nistgħu biex nissospendu jew ngħalqu l-kont tal-utent. Jekk temmen li xi ħaġa fuq is-Servizz tagħna tikser dritt tal-awtur miżmum jew ikkontrollat minnek, jekk jogħġbok irrauppurtaha mill-formola li ssib f'din l-għodda. Inkella tista' tibgħat avviż lill-aġent tagħna: Snap Inc., Attn: Copyright Agent, 3000 31st Street, Santa Monica, CA 90405, email: copyright @ snap.com. Tużax dan l-indirizz tal-email għal skopijiet oħra għajr li tirrapporta ksur ta' drittijiet tal-awtur għax dawk l-emails mhux se nagħtu kashom. Biex tirrapporta xi xorta ta' ksur ieħor fuq is-Servizzi, jekk jogħġbok uża l-għodda li ssib hawn. Jekk tibgħat avviż lill-Aġent tad-drittijiet tal-Awtur tagħna, dan għandu:

• ikollu l-firma bil-miktub jew elettronika ta' persuna awtorizzata li tieħu azzjoni f'isem id-detentur tad-drittijiet tal-awtur;

• jidentifika x-xogħol imħares bid-drittijiet tal-awtur allegat li nkiser;

• jidentifika l-materjal li huwa allegat li qed jikser jew li hu s-suġġett ta' għemil ta' ksur u li għandu jitneħħa, jew aċċess li għalih se jiġi diżattivat u informazzjoni raġonevoli biżżejjed biex inkunu nistgħu nsibu l-materjal;

• jagħti d-dettalji ta' kif nistgħu nikkuntattjawk, fosthom l-indirizz, in-numru tal-mowbajl u indirizz tal-email;

• ikollu stqarrija personali fejn tistqarr li temmen ġenwinament li kif qed jintuża l-materjal li qed tilmenta dwaru mhux użu awtorizzat minn detentur tad-drittijiet tal-awtur, l-aġenti tiegħu jew il-liġi; u

• tagħmel stqarrija fejn tistqarr li l-informazzjoni fl-avviż hija eżatta u li taħlef bil-liġi li int awtorizzat tieħu azzjoni f'isem id-detentur tad-drittijiet tal-awtur.

Fi ftit kliem: Ara li l-kontenut kollu li tqiegħed fuq is-Servizzi jkun tiegħek jew li jkollok il-jedd li tużah. Nistgħu ngħalqulek il-kont jekk tuża l-kontenut ta' ħaddieħor mingħajr permess. Avżana jekk issib xi ħaġa li temmen li tikser il-jeddijiet tal-propjetà intellettwali tiegħek.

Aħna naħdmu ħafna biex is-Servizzi tagħna jkunu post sigur għall-utenti kollha. Imma ma nistgħux nagħtu garanzija li dejjem se jkunu hekk. Għalhekk neħtieġu l-għajnuna tiegħek. Meta tuża s-Servizzi tagħna tkun qed taqbel li dejjem se timxi ma' dawn ir-Regoli fosthom il-Linji Gwida tal-Komunità tagħna u kull politika oħra li Snap iddaħħal fis-seħħ biex iżżomm is-Servizzi siguri.

Jekk ma tagħmilx hekk, aħna għandna l-jedd li nneħħu l-kontenut kollu li jikser ir-Regoli; ngħalqu jew naħbu minn utenti oħra l-kont tiegħek; u li nżommu d-dejta marbuta mal-kont tiegħek skont il-politiki taż-żamma tad-dejta tagħna; u li navżaw lil persuni legali oħra — fosthom il-forzi taż-żamma tal-ordni — u nagħtu lil dawk il-persuni legali l-oħra informazzjoni marbuta mal-kont tiegħek. Dal-pass jaf ikun meħtieġ biex inħarsu s-sigurtà tal-utenti tagħna u ta' nies oħra, biex ninvestigaw, insewwu u nwettqu l-ksur tar-Regoli li jista' jseħħ u biex nagħrfu u nsewwu kull tħassib dwar qerq jew sigurtà.

Aħna nagħtu kas ukoll tas-sigurtà fiżika tiegħek int u tuża s-Servizzi tagħna. Għalhekk tużax is-Servizzi tagħna b'xi mod li jtellfek milli timxi mal-liġijiet tat-traffiku u tas-sigurà. Qatt m'għandek, pereżempju, tuża s-Servizzi int u ssuq. U qatt m'għandek tqiegħed lilek innifsek jew lil oħrajn fil-periklu biex tiġbed Snap jew biex tuża faċilitajiet oħra ta' Snapchat.

Fi ftit kliem: Aħna nippruvaw inżommu s-Servizzi tagħna kemm jista' jkun siguri imma biex nagħmlu hekk neħtieġu l-għajnuna tiegħek. Dawn ir-Regoli, il-Linji Gwida tal-Komunità tagħna u politiki oħra ta' Snap fihom informazzjoni importanti fuq kif tħares is-Servizzi u utenti oħra. U qatt m'għandek tqiegħed lilek innifsek jew lil oħrajn fil-periklu int u tuża s-Servizzi tagħna.

Jeħtieġlek toħloq kont biex tuża xi Servizzi. Għall-kont tiegħek taqbel li tagħtina informazzjoni preċiża, kompluta u aġġornata. Ħlief fil-każ rari li l-kont tiegħek jagħmel xi ħaġa mingħajr il-kontroll tiegħek, int resposnabbli għal kull ħaġa li ssir fuq il-kont tiegħek. Għalhekk importanti li tħares il-kont tiegħek. Mod wieħed ta' kif iżżomm il-kont tiegħek sigur huwa li tagħżel password b'saħħitha li ma tużax għal kontijiet oħra u li tixgħel- l-awtentikazzjoni b'żewġ passi. Jekk jogħġbok ikkuntattja lit-Tim tal-Għajnuna minnufih jekk taħseb li xi ħadd ieħor daħal fil-kont tiegħek. Kull software li nagħtuk jista' jniżżel u jinstalla l-aġġornamenti, t-tiġdid jew faċilitajiet ġodda oħra awtomatikament. Tista' tibdel l-għażliet ta' dan it-tniżżil awtomatiku mill-għażliet tat-tagħmir tiegħek. Int taqbel li ma tistax toħloq kont ġdid mingħajr il-permess tagħna jekk fl-imgħoddi neħħejna jew imblukkajna lilek jew lill-kont tiegħek minn xi wieħed mis-Servizzi tagħna.

Fi ftit kliem: Ħares id-dettalji tal-kont tiegħek. Tużax kontijiet li ma tajniekx permess tuża.

Memorji huwa s-servizz personalizzat tagħna għall-konservazzjoni tad-data. Il-kontenut ta' Memorji jista' ma jkunx disponibbli għal għadd ta' raġjunijiet fosthom problema fil-ħidma tas-servizz tagħna jew l-għażla min-naħa tagħna li ngħalqulek il-kont. Billi ma nistgħux nagħtuk garanzija li l-kontenut dejjem se jkun disponibbli, aħna nissuġġerulek iżżomm kopja seperata mill-kontenut li terfa' f'Memorji. Ma nistgħux nagħtuk garanzija li Memorji se tkun tiflaħ taħżen takkomoda l-ħtiġijiet preċiżi tal-ħażna tiegħek. Aħna nirriżervaw id-dritt li nillimitaw il-konservazzjoni għal Memorji, jew li nipprojbixxu ċerti tipi ta' kontenut milli jkunu eliġibbli għall-użu f'Memorji u nistgħu nibdlu dawn il-limiti minn jeddna minn żmien għal żmien.

Fi ftit kliem: Memorji huwa servizz personalizzat ta' konservazzjoni ta' data, se jingħatalek awtomatikament, imma tista' tikkontrolla ċertu faċilitajiet. Lanqas ma nistgħu nwegħduk li l-Memorji se jinħażnu għal dejjem għalhekk jekk jogħġbok aħżen kopja tagħhom.

Int għandek tħallas kull tariffa tal-mowbajl li teħel talli tuża s-Servizzi tagħna. Dawn it-tariffi jiġbru fihom it-tariffi tal-internet tal-mowbajl u t-tariffi għall-messaġġi bħal pereżempju SMSijiet, MMSijiet jew xorta oħra ta' messaġġi u teknoloġiji oħra (flimkien magħrufa bħala “Messaġġi”). Qabel tuża s-Servizzi għandek tistaqsi lill-operatur tas-servizzi tal-mowbajl tiegħek x'se jkunu dawk it-tariffi jekk ma tafx eżatt kemm jistgħu jitilgħu.

Meta tagħtina n-numru tal-mowbajl tiegħek tkun qed taqbel li, fost oħrajn, tirċievi l-Messaġġi marbuta mas-Servizzi mingħand Snap, fosthom messaġġi dwar l-offerti (meta tagħtina l-permess tiegħek jew meta nistgħu nagħmlu hekk bil-liġi), dwar il-kont tiegħek u dwar ir-relazzjoni tiegħek ma' Snap. Tista' tirċievi dawn il-Messaġġi anki jekk in-numru tal-mowbajl tiegħek huwa rreġistrat fuq xi lista “Do Not Call” jew xi lista internazzjonali bħalha.

Jekk tibdel jew tneħħi n-numru tal-mowbajl li użajt biex toħloq kont, jeħtieġlek tibdel id-dettalji tal-kont tiegħek mill-Għażliet fi żmien 72 siegħa biex b'hekk ma nibagħtux il-messaġġi maħsuba għalik lil ħaddieħor.

Fi ftit kliem: Nistgħu nibagħtulek xi Messaġġi u jaf ikollok tħallas xi tariffi lill-operatur tal-mowbajl tiegħek meta tuża s-Servizzi tagħna.

Xi Servizzi jistgħu juru, jiġbru fihom jew jagħtu kontenut, dejta, informazzjoni, apps, faċilitajiet jew materjali minn persuni oħra (“Materjal ta' Persuni Oħra”), jagħtu ħoloq għal xi siti ta' persuni oħra jew iħalluk tuża s-servizzi ta' persuni oħra b'rabta magħhom. Jekk tuża xi Materjal ta' Persuni oħra jew servizzi ta' persuni oħra b'rabta jew mis-Servizzi tagħna (fosthom is-Servizzi li noffru flimkien mal-persuna l-oħra), ir-regoli fis-seħħ tal-persuna l-oħra se jgħoddu għalik. La Snap u lanqas l-imsieħba tagħna mhuma responsabbli għar-regoli ta' persuna oħra jew għall-għemil li jaqa' taħt ir-regoli tal-persuna l-oħra. Barra minn hekk, meta tuża s-Servizzi tkun qed tagħraf u taqbel li Snap mhix responsabbli li tiċċekkja u tgħarbel il-kontenut jekk hux preċiż, komplut, disponibbli, ġdid, tajjeb, jekk iħarisx il-jeddijiet tal-awtur, jekk hux legali, diċenti, ta' kwalità jew kull ħaġa oħra marbuta ma' dan il-Materjal ta' Persuni oħra jew servizzi jew siti ta' persuni oħra. Aħna ma nagħtu l-ebda garanzija jew approvazzjoni u ma naċċettaw u lanqas se jkollna responsabbiltà lejn jew lejn nies oħra għas-servizzi ta' persuni oħra, għall-Materjal ta' Persuni Oħra jew għal siti ta' persuni oħra jew għal kull xorta ta' materjal, prodotti jew servizzi ta' persuni oħra. Il-Materjal ta' Persuni Oħra, id-disponibbiltà ta' servizzi u l-ħoloq lejn siti ta' persuni oħra qed jingħatawlek biss bħala forma ta' għajnuna.

Fi ftit kliem: Snap mhux responsabbli għall-faċilitajiet, għall-kontenut jew għas-servizzi ta' persuni oħra li tista' tasal għalihom permezz jew b'rabta mas-Servizzi tagħna – jekk jogħġbok ara li taqra r-regoli tal-persuni l-oħra.

Aħna l-ħin kollu naħdmu qatigħ biex intejbu s-Servizzi tagħna u noħolqu oħrajn ġodda. Dan ifisser li maż-żmien nistgħu nżidu jew inneħħu xi faċilitajiet, prodotti jew ħidmiet u nistgħu wkoll nissospendu, niddiżattivaw jew intemmu s-Servizzi għal dejjem. Nistgħu nagħmlu hekk meta rridu għal kull xorta ta' raġuni u — għalkemm mhux dejjem nafu nkunu nistgħu nagħmlu hekk — meta nagħmlu hekk se nippruvaw navżawk minn qabel.

Dan ifisser ukoll li kultant ikun jeħtiġilna nibdlu dawn ir-Regoli biex naddattawhom għall-bidliet fis-Servizzi tagħna jew għal kif noffru dawk is-Servizzi kif ukoll biex nimxi mar-rekwiżiti legali jew għal raġunijiet legali jew ta' sigurtà oħra. Jekk dawk il-bidliet f'dawn ir-Regoli ikunu kbar, aħna se navżawk raġjonevolment bil-quddiem (sakemm dawk il-bidliet ma jkunux meħtieġa qabel pereżempju jekk ikun hemm xi bidla fil-liġijiet jew jekk inkunu qed inniedu xi Servizzi jew faċilitajiet ġodda). Jekk wara li dawk il-bidliet jidħlu fis-seħħ tkompli tuża s-Servizzi, aħna se nqisu li aċċettajt dawk il-bidliet.

Fi ftit kliem: Is-Servizzi tagħna se jinbidlu maż-żmien. Minn żmien għal żmien nistgħu nibdlu dawn ir-Regoli biex naddattawhom għal dawn il-bidliet jew għal raġunijiet oħra.

Għalkemm nittamaw li tibqa' utent ta' Snapchat għal ħajtek kollha, tista' tħoll ir-rabta minn dawn ir-Regoli meta trid jekk ma taqbilx mal-bidliet li nagħmlu f'dawk ir-Regoli jew għal kull raġuni oħra billi tħassar il-kont ta' Snapchat tiegħek (jew f'xi każijiet, il-kont marbut mal-parti tas-Servizzi li tkun qed tuża).

Jekk tikser dawn ir-Regoli, il-Linji Gwida tal-Komunità tagħna jew il-liġi, kemm għal raġunijiet barra l-kontroll tagħna kif ukoll għal raġunijiet oħra, nistgħu nillimitaw, inneħħu jew nissospendu għal ftit żmien l-aċċess tiegħek għas-Servizzi. Dan ifisser li nistgħu ntemmu dawn ir-Regoli, nieqfu nagħtu is-Servizzi tagħna jew parti minnhom jew indaħħlu fis-seħħ limiti ġodda jew miżjuda biex tkun tista' tuża s-Servizzi tagħna. Nistgħu pereżempju niddiżattivawlek il-kont jekk iddum ma tużah u nistgħu nieħdu lura l-isem tal-utent tiegħek meta rridu, tkun xi tkun ir-raġuni. U għalhekk se nagħmlu l-almu tagħna biex navżawk biżżejjed bil-quddiem, ma nistgħux nagħtuk garanzija li dejjem se nkunu nistgħu navżawk bil-quddiem.

Meta nillimitawlek, ngħalqulek jew nissospendulek l-aċċess għas-Servizzi minħabba ksur tal-Linji Gwida tal-Komunità tagħna, aħna se navżawk u se nagħtuk l-opportunità li tressaq appell.

Qabel nillimitawlek, ngħalqulek jew nissospendulek l-aċċess għas-Servizzi aħna se nqisu l-fatti u ċ-ċirkostanzi kollha skont l-informazzjoni li jkollna u skont ir-raġuni għaliex inkunu se nwettqu l-għemil tagħna. Jekk pereżempju tikser il-Linji Gwida tal-Komunità tagħna, aħna se nqisu l-gravità, kemm-il darba tkun ksirt dawn il-linji gwida u l-effett tal-ksur kif ukoll il-ħsieb wara l-ksur. Din l-informazzjoni se jgħinna nifhmu jekk għandniex nillimitawlek, ngħalqulek jew nissospendulek l-aċċess għas-Servizzi tagħna u jekk nagħżlu li nissospendulek l-aċċess, għal kemm tul ta' żmien se nagħmlu hekk. Tista' żżur is-Sit tal-Għajnuna tagħna biex issir taf iktar dwar kif inqisu u nirreaġixxu f'każ ta' użu mhux xieraq tas-Servizzi tagħna.

Ikun min ikun li jtemm dawn ir-Regoli, kemm int kif ukoll Snap tibqgħu marbuta b'Artiklu 2, Artiklu 3 (sakemm ir-regoli u l-kundizzjonijiet miżjuda jdumu, skont ma jgħidu huma, fis-seħħ) u minn Artikli 6 sa 23 tar-Regoli.

Fi ftit kliem: Tista' tieqaf tuża s-Servizzi jew tħassar il-kont tiegħek meta trid u għal kull raġuni, fosthom li ma taqbilx ma' xi bidliet f'dawn ir-Regoli. Nistgħu nillimitawlek jew inneħħulek l-aċċess għas-Servizzi minħabba r-raġunijiet imsemmija hawn fuq. Meta nagħmlu hekk, ħafna drabi se navżawk u se nagħtuk l-opportunità li tressaq appell.

Int taqbel li sakemm il-liġi tħallik tagħmel hekk, tagħmel tajjeb, tiddefendi, u tħoll mir-responsabbiltà ċivili lil Snap u l-imsieħba, id-diretturi, it-tmexxija, l-azzjonisti, il-ħaddiema, is-sidien tal-propjetà intellettwali u l-aġenti tagħna f'kull każ f'kull xorta ta' lment, akkuża, talba, danni, telf, nefqa, responsabbiltà legali, u spejjeż (fosthom l-ispejjeż tal-avukati) li jkollhom iħallsu, jew jeħlu, jew b'xi mod ikunu marbuta: (a) mal-fatt li għandek aċċess jew tuża s-Servizzi, (b) mal-kontenut tiegħek fosthom ix-xiljiet ta' ksur tar-regoli marbuta mal-kontenut tiegħek, (ċ) mal-ksur min-naħa tiegħek ta' dawn ir-Regoli jew ta' xi liġi jew regolament li obbligat/a timxi magħhom jew (d) man-negliġenza jew ma' mġiba ħażina li tkun saret bi ħsieb.

Fi ftit kliem: Taqbel li tagħtina kumpens jekk tagħmlilna xi ħsara jew twassal biex nagħmlu xi telf.

Aħna se nagħmlu l-almu tagħna biex inżommu s-Servizzi jaħdmu mingħajr xkiel. Imma ma nagħtu l-ebda garanzija li se jirnexxielna.

Dawn is-Servizzi qed jingħataw mingħajr garanzija tal-ħidma tas-servizz u mingħajr garanzija tad-disponibbiltà tas-servizz u, sakemm nistgħu nagħmlu hekk bil-liġi u bl-eċċezzjoni ta' dak li msemmi hawn fuq, mingħajr ebda xorta ta' garanzija, la diretta u lanqas mifhuma, fost oħrajn, garanziji, kundizzjonijiet jew regoli oħra mifhuma marbuta: (a) mal-fatt li s-servizz lest għas-suq, li joffri kwalità tajba, li huwa addattat għal xi skop partikolari, mas-sjieda, mal-jedd tal-użu,, man-nuqqas ta' ksur ta' regoli jew (b) ma' drawwa mnissla mill-użu. Minbarra dan, għalkemm nipprova nagħtu lill-utent esperjenza sabiħa, ma nagħmlux stqarrijiet u ma nagħtux garanziji li: (i) is-Servizzi dejjem se jkunu kollha siguri, mingħajr żbalji jew mogħtija fil-ħin, (ii) is-Servizzi se jaħdmu dejjem mingħajr dewmien, xkiel jew problemi jew (iii) kull xorta ta' kontenut jew informazzjoni li tikseb mis-Servizzi se Jkun aġġornat jew eżatt.

JEKK IL-LIĠI TAL-PAJJIŻ FEJN TGĦIX TOBBLIGANA NOFFRU L-GARANZIJI MSEMMIJA F'DIN IL-KLAWŻOLA, DAWN IL-GARANZIJI SE JINGĦATAW BISS SAL-LIVELL MEĦTIEĠ BIL-LIĠI.

Sa fejn nistgħu nagħmlu hekk bil-liġi, Snap, Snap Inc. u l-imsieħba tagħna ma jieħdu u ma jaċċettaw ebda responsabbiltà għall-kontenut li int, utenti oħra jew persuni oħra toħolqu, ttellgħu, tippubblikaw, tibagħtu, tirċievu, taraw jew taħżnu fuq jew bis-Servizzi tagħna u tifhem u taqbel li jaf tintwera kontenut li joffendi, illegali, qarrieqi jew b'xi mod ieħor mhux addattat u li la Snap u lanqas Snap Inc. jew l-imsieħba tagħna mhuma se jkunu responsabbli għalih.

L-ebda ħaġa f'dawn ir-Regoli ma tneħħi jew tillimita r-responsabbiltà li jaf ikollna skont il-liġi tal-pajjiż fejn tgħix biex inneħħu l-kontenut.

Fi ftit kliem: Snap se tipprova tagħtik is-Servizzi imma ma nistgħu nwegħduk xejn b'rabta mal-kwalità u mhux se nkunu responsabbli għall-kontenut li mhux tagħna.

Snap, Snap Inc. u l-imsieħba, id-diretturi, it-tmexxija, l-azzjonisti, il-ħaddiema, is-sidien tal-jeddijiet tal-awtur, il-fornituri u l-aġenti tagħna mhux se jkunu responsabbli għal danni indiretti, aċċidentali, speċjali, konsegwenzjali, għaddieba jew għadd ta' danni, jew telf ta' qligħ jew dħul, kemm dirett kif ukoll indirett, jew xi telf ta' dejta, użu, fama jew telf mhux tanġibbli minħabba: (a) li tuża jew li ma tkunx tista' tuża s-Servizzi, (b) li taċċessa jew li ma tkunx tista' taċċessa s-Servizzi, (ċ) l-imġiba jew il-kontenut ta' utenti jew persuni oħra fuq jew bis-Servizzi jew (d) aċċess, użu jew bidliet bla permess tal-kontenut tiegħek. Sakemm ma jkunx hemm miktub mod ieħor f'xi regola oħra fis-seħħ ta' Snap, Snap Inc. jew tal-imsieħba tagħna, ir-responsabbiltà li Snap Inc. jew l-imsieħba tagħna jistgħu jkunu responsabbli għaliha qatt ma tista' taqbeż l-ikbar waħda bejn (a) €100 EUR jew (b) is-somma li ħallast lil Snap fl-aħħar 12-il xahar għal xi Servizz.

L-ebda ħaġa f'dawn ir-Regoli (jew biex inkunu ċari, xi regoli oħra li obbligat/a timxi magħhom għas-servizzi mogħtija minn Snap, Snap Inc. jew l-imsieħba tagħna) ma teskludi jew tillimita r-responsabbiltà ta' Snap, Snap Inc. jew l-imsieħba tagħna għal: (a) mewt jew korriment bi ħsieb jew minħabba nuqqas ta' ħsieb, (b) qerq jew informazzjoni qarrieqa jew (ċ) kull xorta oħra ta' responsabbiltà sa fejn il-liġi ma tħalliniex neskludu jew nillimitaw din ir-responsabbiltà.

Minbarra dan, xejn f'dawn ir-Regoli ma jneħħi mill-jeddijiet li bħala konsumatur tagħtik il-liġi.

JEKK IL-LIĠI TAL-PAJJIŻ FEJN TGĦIX MA TĦALLIX LI XI RESPONSABBILTÀ MSEMMIJA F'DIN IL-KLAWŻOLA TIĠI LIMITATA, DAK LI TGĦID IL-LIĠI GĦANDU JGĦODD FUQ DAK IL-LIMITU.

Fi ftit kliem: Nistgħu nillimitaw ir-responsabbiltà tagħna għal kull ħaġa li tagħmel, għal sitwazzjonijiet fejn ma tkunx tista' taċċessa s-Servizzi, għall-għemil tal-oħrajn u għal kull problema li toħroġ mill-użu mhux aċċettabbli tas-Servizzi tagħna. Fejn aħna nkunu responsabbli għad-danni u int tkun ġarrabt xi telf, ir-responsabbiltà tagħna hija limitata għal somma fissa.

Jekk għandek xi tħassib. ejja nitkellmu. Ibda billi tikkuntattjana u nagħmlu l-almu tagħna biex insibu soluzzjoni għall-problema.

Xi wħud mis-Servizzi tagħna jaf ikollhom iktar regoli b'dispożizzjonijiet li fihom riżoluzzjonijiet ta' kwistjoniet li jgħoddu biss għal dawk is-Servizzi jew għar-residenza tiegħek.

Jekk qed tuża s-Servizzi f'isem negozju (minflok għall-użu personali tiegħek), int u Snap taqblu li sal-limitu permess mil-liġi, it-talbiet u t-tilwim kollu ta' bejnietna marbut ma' dawn ir-Regoli jew mal-użu tas-Servizzi għandu jissolva b'arbitraġġ b'rabta legali skont ir- Regoli tal-Arbitraġġ LCIA, li huma inkorporati b'referenza f'din il-klawżola. Għandu jkun hemm arbitru wieħed (magħżul minn LCIA), l-arbitraġġ se jitmexxa ġewwa Londra, u l-arbitraġġ se jitmexxa bl-Ingliż. Jekk ma tixtieqx taqbel ma' din il-klawżola, m'għandekx tuża s-Servizzi.

Fil-qosor: Ikkommunika magħna jekk għandek xi lment. It-tilwim mal-utenti kummerċjali se jiġu solvuti permezz ta' arbitraġġ.

Sa fejn dawn ir-Regoli jħallu lilek jew lil Snap tressaq ilment quddiem qorti, kemm int kif ukoll Snap taqblu li t-talbiet u l-ilmenti kollha (kemm marbuta ma' kuntratt jew dawk xorta oħra), li ġejjin minn jew marbuta mar-Regoli jew l-użu tas-Servizzi, se jinġiebu biss quddiem il-qrai tal-Ingilterra ġewwa r-Renju Unit, sakemm dil-ħaġa ma tmurx kontra l-liġijiet tal-pajjiż fejn toqgħod. Int u Snap taċċettaw li dawk il-qrati biss ikollhom il-ġurisdizzjoni.

Dawn ir-Regoli u kull talba jew ilment (kemm dawk imsejsa fuq kuntratt jew tort kif ukoll ilmenti oħra) dwar jew marbuta ma' dawn ir-Regoli jew is-suġġett tagħhom jaqgħu taħt il-liġijiet tal-Ingilterra u Wales. Il-qrati ta' xi pajjiżi jafu ma jużawx il-liġijiet tal-Ingilterra u Wales għal xi tilwim marbut ma' dawn ir-Regoli. Jekk toqgħod f'xi wieħed minn dawn il-pajjiżi, il-liġijiet tal-pajjiż fejn toqgħod jafu jgħoddu għal dak it-tilwim.

Jekk xi dispożizzjoni ta' dawn ir-Regoli titqies li ma tistax titwettaq, dik id-dispożizzjoni se titneħħa minn dawn ir-Regoli u mhux se taffettwa l-validità u t-twettiq tal-bqija tad-dispożizzjonijiet.

Dawn ir-Regoli, fosthom ir-regoli miżjuda msemmija f'Artiklu 3, huma l-ftehim kollu bejnek u bejn Snap u jieħdu post kull ftehim ieħor milħuq qabel. Dawn ir-Regoli ma joħolqu jew jagħtu l-ebda jeddijiet lil persuni oħra. Jekk ma nwettqux xi dispożizzjoni ta' dawn ir-Regoli, ma jfissirx li ċedejna l-jedd tagħna li nwettqu dawn ir-Regoli. Għandna l-jedd li ngħaddu l-jeddijiet tagħna skont dawn ir-Regoli lil ħaddieħor u li sakemm dik il-persuna legali timxi ma' dawn ir-Regoli, li noffru s-Servizzi minn persuna legali oħra. Ma tistax tgħaddi l-ebda wieħed mill-jeddijiet jew l-obbligi tiegħek skont dawn ir-Regoli lil ħaddieħor mingħajr il-kunsens tagħna. Aħna nżommu l-jeddijiet kollha li ma tajniekx bl-iktar mod ċar. Fejn tajna taqsimiet fejn fissirna dawn ir-Regoli fi ftit kliem, dawn it-tifsiriet fil-qosor ingħataw biss biex inħaffu l-fehim tiegħek. Biex tifhem il-jeddijiet u l-obbigi legali tiegħek jeħtieġlek taqra dawn ir-Regoli mill-bidu sal-aħħar.

Snap tapprezza l-kummenti, il-mistoqsijiet, it-tħassib u s-suġġerimenti tiegħek kollha. Tista' tikkuntattjana jew titlobna l-għajnuna minn hawn.

Jekk tgħix fir-reġjun Asja-Paċifiku jew jekk il-post prinċipali tan-negozju tiegħek huwa ġewwa ir-reġjun Asja-Paċifiku, li għal dawn ir-Regoli jiġbor fih l-Afganistan, l-Indja, il-Kirgistan, il-Każakistan, il-Pakistan, it-Taġikistan, it-Turkmenistan u l-Użbekistan, imma ma jiġborx fih l-Armenja, l-Ażerbajġan, il-Ġeorġia, il-Federazzjoni Russa u t-Turkija: 

• il-kumpanija responsabbli għas-Servizzi hi l-Fergħa ta' Singapore ta' Snap Group Limited u hija bbażata ġewwa Singapore fl-indirizz #16-03/04, 12 Marina Boulevard, Marina Bay Financial Centre Tower 3, Singapore 018982. UEN: T20FC0031F. Numru tal-VAT: M90373075A; u

• kwalunkwe referenza għal "Snap" f'dawn ir-Regoli tfisser il-Fergħa ta' Singapore ta' Snap Group Limited. 

Għall-bqija, il-kumpanija responsabbli għas-Servizzi barra l-Istati Uniti tal-Amerka u r-reġjun Asja-Paċifiku hija Snap Group Limited li tinsab fir-Renju Unit fuq l-indirizz 50 Cowcross Street, Level 2, London, EC1M 6AL, United Kingdom. In-numru tar-reġistru tal-kumpanija: 09763672. Numru tal-VAT: GB 237218316.